Каде исчезнуваат индустриските работници

Добивај вести на Viber

Продолжува трендот на намалување на бројот на работници во индустријата. Последните податоци на Државниот завод за статистика велат дека во месец март во споредба со истиот месец минатата година сме имале намалување на бројот на работници за 1,5 отсто.

Најголем пад на бројот на работници има во секторите Рударство и вадење камен – 3,7 отсто, потоа во Преработувачката индустрија - 1,4 проценти, а сектор Снабдување со електрична енергија, гас, пареа и климатизација 1,7 отсто.

Тенденцијата на опаѓање на бројот на работници не е нова, но се забележува дека истата се повторува изминатиов период и е присутна кај дел од трудоинтензивните дејности, но и во сектори кои се подобро платени.

Упатените велат дека ваквата појава може да се должи на повеќе фактори, меѓу кои воениот конфлик во Украина, прекинот на синџирите на снабдување, но и на екстремно високите цени на енергијата за компаниите.

-  Состојбите во економијата се многу неизвесни. На корона кризата се надоврза конфликтот во Украина, прекините во синџирите за снабдување, но и енегетската криза поради која цента на струја за компаниите е многу висока. Зголемените трошоци негативно влијаат врз компаниите, кои поради тоа не вложуваат во нова технологија, но и во човечки ресурси. Тенденцијата е присутна и кај секторот енергетика, каде има намалување на број на работници, но и во компаните од трудоинтензивните дејности – вели Ангел Димитров, претседател на Собранието на Организацијата на работодавачи на Македонија.

Димитров за „Фактор“ посочува оти постојаниот раст на трошоците за компаните ги усложнува состојбите бидејќи не можат да ги зголемуваат постојано цените на своите производи, а со намалувањето на приливите во компаниите под прашање е нивниот опстанок и рентабилноста.

-  Намалувањето на профитот за компаниите ги намалува средства за редовно одржување и обнова на технологијата. Неизвесноста е најголема пречка за развој на економијата, а со траењето на конфликтот, кој не се знае кога ќе заврши, состојбите не очекуваме да се стабилизираат наскоро. Ова негативно се одразува и врз отворањето нови фирми, кои би привлекле нови вработувања, но и  тоа е под знак прашалник поради кризата. Дополнително имаме врботени кои одат во пензија, но дали на нивно место се вработуваат нови лица е неизвсно, особено поради кризата поради која компаниите помалку вложуваат во нови човечки ресурси – потенцира Димитров. 

Петранка Огнаноска