ЈУБИЛЕЈ: Македонско-руската стопанска комора слави 10 години постоење
Објавено во: Економија 25 Март, 2015
Десет години успешна соработка слави мостот на економското поврзување кое ги спојува Македонија и Руската Федерација во македонско-руска стопанска комора.
Иницијативата за создавање на оваа невладина организација се појави во годините на т.н. „раѓање на коморски плурализам“ во Република Македонија. Главен иницијатор беше Руско-македонското друштво во Скопје во соработка со амбасадата на Руската Федерација во Република Македонија.
Денес, Македонско- руската стопанска комора претставува мост за економско поврзување на двете земји.
Најголемите успеси ги поврзуваат со неколку важни моменти. Најнапред тоа е успешното работење, кое придонесе да остварат партнерски договор со Стопанската комора на РФ, а потоа и со уште шест регионални руски стопански комори. Потоа, активното работење во работната група за трговска соработка при меѓувладината комисија за трговско-економска и научно-техничка соработка.
Како важна ја издвојуваат соработката со ресорните министерства околу организацијата на национални штандови во Руската Федерација, со учество на македонски компании таму.
Со своите успешни заложби за континуирано промовирање на интересите на сите свои членки, Македонско-руската стопанска комора е веќе етаблиран и доверлив партнер на полето на соработка со Руската Федерација и е член на мешовитата Македонско - руска меѓувладина комисија за трговско-економска и научно-техничка соработка.