ИТНО ДА СЕ ВРАБОТАТ ПОЖАРНИКАРИ: Доаѓа лето, а нив ги нема во доволен број
Објавено во: Македонија 09 Април, 2024
Утрово во 9.50 часот примена е дојава за пожар во Универзална и веднаш се испратени две возила од Тафталиџе, но поради високиот чад тие побараа и дополнителна помош, изјави Звонко Томевски, командант на ППЗ на Град Скопје, по пожарот во Универзална сала.
„Интервениравме до девет возила и 24 пожарникари. За кусо време, благодарение на пожртвуваноста на колегите, пожарот беше ставен под контрола, иако имаше висока температура во објектот. Би сакал да се заблагодарам на полицијата и Комунална хигиена и Водовод кои конинуирано снабдуваа со вода. Причините ќе ги утврди полицијата. Нема повредени од колегите, немало градежни работници во моментот. Има оштетување на околните објеки поради високата температура, но за среќа нема повредени“, вели тој.
Додава дека нема доволно пожарникари.
„Најголем проблем се пожарникарите, кои ги немаме во доволен број. Апелирам до властите дека што е можно поскоро да се вработат пожарникари, функционираме со 40 проценти, а доаѓа лето. Навистина не знаеме како ќе се одвиваат работите“, рече Томевски.
Неговиот колега Боби Вељаноски исто вели дека се потребни повеќе пожарникари инаку, како што вели „Господ нека ни е на помош“. Тој нагаласи дека во јавните настапи претходно потенцирал дека се потребни повеќе пожарникари. Според него, итно се потребни нови вработувања во противпожарната служба на Град Скопје.