Испораките на нафта од Русија во Индија се зголемени за 22 пати

Добивај вести на Viber

Испораките на нафта од Русија за Индија се зголемени за 22 пати минатата година, изјави рускиот вицепремиер  задолжен за енергетика Александар Новак.

„Поголемиот дел од нашите енергетски ресурси се пренасочени на други пазари, пазари на пријателски земји“, кажа Новак.

Тој на состанокот на колегиумот на Министерството за енергетика на Русија рече дека испораките за Кина и другите пазари се зголемени, пренесува РИА Новости.

Агенцијата наведува дека Новак претходно во март објавил дека Русија минатата година и испорачала на Кина околу 67 милиони тони нафта, што претставува речиси една третина од нејзиниот вкупен извоз.

Зголемувањето на извозот е знак за преориентација на руската економија кон гигантите на азискиот континент во услови на конфликт во Украина.

Новак посочи дека преориентацијата на енергетските текови бара продолжување на работата на формирањето на флотата на танкери, подобрување на плаќањата и создавање нови системи за осигурување.

„Нашите пријателски земји се нови пазари лоцирани во азиско-пацифичкиот регион, Латинска Америка, Арктикот, Централна и Централна Азија“, рече Новак, пренесе Интерфакс, а пренесува Танјуг.

Според него, затоа е важно Русија да го задржи темпото поврзано со создавање механизми и инструменти кои ќе и овозможат сигурно снабдување на нови пазари оваа година.

„Станува збор за логистички синџири и продолжување на формирањето на флотата на танкери, создавање инструменти за плаќање, транзиција кон националните валути“, додаде Новак.