ИНТЕРВЈУ СУГАРЕСКИ: Нема да дозволиме партиски моќници да влијаат во легализација на дивоградбите

Добивај вести на Viber

Деновиве се бореше со бранот критики од јавноста околу законот за легализација на дивоградбите, кој беше изгласан од Владата, а во Собрание ќе се носи по скратена постапка. Сепак, успеа барем засега да го смири револтот, откако потврди дека дивоградбите во Охрид и во Струга кои се во заштитено подрачје и лошо би влијаеле врз културното наследство и животната средина, нема да се легализираат. Нема легализирање ниту на станбените згради, заедно со доградбите и терасите. Во интервју за Фактор, министерот за транспорт и врски, Горан Сугарески, уверува дека власта со законот има чесни намери и нема да се дозволат партиски притисоци во легализацијата. Со него зборувавме и за потфрлањето на капиталните инвестиции, гасификацијата, но и за неговите политички очекувања.

Владата го усвои Предлог законот за легализација на дивоградбите, кој влегува во Собрание по скратена постапка. Се слушнаа жестоки критики за ова законско решение. Што ќе кажете за сите овие загрижености и што ќе им порачате на критичарите, дали Владата има чесни намери со носењето на законот?

Сугарески: Намерите на власта се најчесни. За нас главна цел е да го решиме правниот статус на бесправно изградените објекти. Постојат две опции – или тие да се легализираат, или треба да се рушат. Со овие измени, клучна е измената на средствата, па ако со претходниот закон беше едно евро за квадрат, сега ќе се плаќаат 100 отсто од комуналиите, плус 50 проценти како своевидна казна за тоа што е бесправно градено. Или 150 проценти од вредноста на комуналиите. Останува делот дека социјалните случаеви ќе бидат ослободени. Го решаваме и делот на каналската канализација. Има две клучни работи во законот – едната е делот на охридско- струшкиот регион, за УНЕСКО, и тука сакам да ги отфрлам сите шпекулации дека ќе важи комплетно за Охрид и Струга. Апсолутно нема да важи комплетно, туку само во подрачјата, за кои веќе се направени две студии за оценка на влијанија, а со кои ќе се оценува дали дивоградбите влијаат врз животната средина и врз културното наследство. Во делот на заштитетните подрачја ќе мора да биде прибавена согласност од страна на Министерството за животна средина, Министерството за култура и Министерството за економија. Всушност, општините ќе ја прават легализацијата, и тоа мора да биде предвидено во планскиот опфат. Доколку не е, одлуката ја носи Советот на општината, дали објектот ќе биде легализиран или не. Така што, во законот воопшто не станува збор за онаа опција дека секој секаде ќе може да гради. И вториот дел што е важен од овој закон, е дека нема да може да се легализираат А2 објектите, односно зградите за станбено домување.

Објаснете им на граѓаните, нема да може да се легализираат ниту згради, ниту, пак, терасите и другите доградби со кои станарите ги прошириле своите станови?

Сугарески: Со членот 4 од законот, тоа е апсолутно решено. Станува збор за станбени згради А2, каде што не може да се прават ниту доградби, ниту надградби. И тоа конкретно се однесува и за терасите. И тука со законот е целосно расчистена работата. Ќе потенцирам и уште една работа – станува збор за предлог на закон. Последниот збор за носењето на законот го има Собранието. Ќе видиме како ќе се развива дебатата таму, и врз база на тоа дали ќе има амандмани или не.

Значи, тоа што нема да се легализираат станбените згради е всушност и одговор на забелешките дека објектите што ќе се легализираат ќе бидат без проверка од ИЗИИС?

Сугарески: Да, апсолутно, со самото тоа што станбените згради не се опфатени во законот, ова прашање е решено.

Колку дивоградби очекувате дека ќе се легализираат со овој нов закон?

Сугарески: Не можам да шпекулирам со бројката. Бидејќи општините ќе ја прават легализацијата, тие нас тоа ќе ни го достават како бројка. Второ, не можеме да предвидиме колку од оние што аплицирале со претходниот закон, но не исполниле одредени услови, односно не доставиле одредена документација, ќе бараат легаизација и со новиот закон. Бидејќи, со новиот закон ќе биде предвидено сите што не ги исполниле условите со претходниот, да можат да поднесат барање со новиот закон, при што тогаш за нив ќе важат правилата на новиот закон, односно ќе се плаќа 150 отсто од комуналиите. И затоа не може точна бројка да се каже, бидејќи никој не може точно да каже колку баратели ќе има кои не ги исполниле условите од претходниот закон. 

ИЛИ ЛЕГАЛИЗАЦИЈА ИЛИ УРИВАЊЕ - ТРЕТО НЕМА

Колку има постапки што не се решени со стариот закон?

Сугарески: Па мислам дека досега се решени преку 240 илјади, а во постапка на решавање се околу стотина илјади.

Значи, оние кои аплицирале според стариот закон и ги имале сите потребни документи, а постапките не им се завршени, ќе си ги легализираат објектите по едно евро за квадрат?

Сугарески: Да, ќе ги легализираат по едно евро, согласно претходниот закон. Оние, пак, кои при аплицирањето до соодветната општина, не доставиле дел од потребната документација што била барана, автоматски тие не можеле да легализираат, бидејќи не ги исполниле условите. Е сега, со новиот закон ќе имаат право повторно да поднесат барање, меѓутоа нема тоа да биде по едно евро, туку ќе мора да платат 150 отсто од комуналиите, во зависност од тоа колку изнесуваат комуналните такси во општината.

Оние граѓани или фирми што во тој рок од шест месеци нема да поднесат барање, дали ќе се рушат?

Сугарески: Решавањето на правниот статус значи тоа, или треба да се легализира, или да се урива. Трето нема.

Очекувате ли дека граѓаните, под овие услови, со плаќање на 150 отсто од комуналиите, ќе доставуваат барања за легализација?

Сугарески: Очекувам дека секаде каде што условите тоа го дозволуваат и каде што планскиот опфат го дава тоа право, граѓаните да ја искористат оваа можност, согласно новиот закон. Доколку не го направат тоа, дивоградбите ќе мора да се уриваат.

Можете ли да ветите пред јавноста дека оние чии објекти нема да ја добијат потребната согласност од институциите, што значи дека нема да можат да бидат легализирани, дека ќе бидат урнати?

Сугарески: Мора да бидат урнати, бидејќи нема да биде решено нивното прашање.

Министре, свесни сме дека ќе има многу политички притисоци за некои моќници во одредени општини, кои ќе бараат врски за да не се уриваат нивните бесправно изградени објекти. На пример, некој функционер од ДУИ ќе се закани или слично. Дали ќе одолеете на тие притисоци?

Сугарески: Значи Владата и Министерството со најчесни намери го предлагаат овој закон. Исклучувам било какви партиски влијанија. И во носењето на законот за голем дел работи за кои сметавме дека треба да ги внесеме, се внесени. Затоа не случајно го споменав и Охридско-струшкиот регион и оцената на влијанието на животната средина, како и исклучувањето на станбените згради. Така што не гледам зошто било кој што ќе има можност, да не си го реши својот случај. Не гледам потреба од никакви влијанија.

Дали оние што нема да добијат согласност од институциите, или од советите на општините, ќе бидат урнати, и дали и во тој дел се можни политички влијанија?

Сугарески: Ако не добие согласност, тогаш работа на државата е, согласно ингеренциите, да го решат случајот, односно да го урне тој објект. 

ДОБРА Е АЛАТКАТА ШТО МЕРИ КОЈ КОЛКУ ПОТРОШИЛ КАПИТАЛНИ ИНВЕСТИЦИИ

Капиталните инвестиции за 10 месеци од годинава се искористени со само 40,8 отсто, и тоа не од првичниот, туку од ребалансираниот буџет, со кој тие се намалија на 369 милиони евра. И од опозицијата трпите многу критики за оваа слабост. Која е клучна причина што Владата не успеа, веќе втора година по ред, да „нагази“ со капитални инвестиции, туку напротив, тие се исклучително ниски?

Сугарески: Прво, и тоа не е оптимистички, но очекувам овој процент сериозно да биде зголемен до крајот на годината, од она што го имам како информација. Има неколку причини зошто го зборувам тоа. Одредени министерства треба да исплатат сериозни суми на пари, заедно со Владата, така што моите очекувања се дека овој процент, кој е заклучно со октомври, сериозно ќе биде зголемен. Не би шпекулирал колку, но ќе биде сериозно надминат. Причините за неисполнувањето, секој треба да си ги каже од својот ресор. Но, една работа која често се јавува како причина, е што паѓање на еден тендер, носи неколку месеци нереализација. Некои плаќања - времени или завршни ситуации, се предвидува да се случат септември, октомври, ноември, и затоа не случајно велам дека четвртиот квартал секогаш е најсилен. Или, може да е предвиден одреден проект, но проектирањето не завршило навреме, на пример поради проблеми со проектанти или со некои забелешки што ги дало ресорното министерство, и се одложува изведбата за неколку месеци

Но дали покрај овие објективни причини, нема да признаете дека има и слабости во администрацијата?

Сугарески: Никогаш не треба да се амнестираме од субјективните причини. Апсолутно. Далеку од тоа дека оваа Влада е безгрешна. Сигурно има и субјективни причини. Но ние се обидуваме во од да ги решаваме работите.

Но, морам да кажам конкретно за Министерството за транспорт. Ние имаме одлична релизација, и ќе имаме, согласно тие две завршни ситуации кои ги очекуваме да дојдат во тие неколку дена. Последниот процент што го имавме беше близу 72 отсто. Да не бидат шпекулации, но мислам дека Министерството за транспорт ќе биде сигурно близу 80 отсто. Во делот со гасификацијата, таму ќе надминеме преку 90 проценти реализација. Делот на железниците исто е зголемен во третиот и четвртиот квартал. И се што работиме во делот на водоводни канализации и системи, на пример зоната во Визбегово водоводот се работи интензивно, а завршен е и тендерот за канализација. И за канализацјата во Арачиново исто така тендерот е звршен и очекуваме воведување во работа. Значи, ресорното министерство има одлична реализација. А и Јавното претпријатие за државни патишта, кое не е буџетски корисник, исто така има преку 75 проценти реализација. Патиштата не влегуваат во капитални расходи од буџетот,  а секаде први се набројуваат како капитални инвестиции. Делот на социјалните станови исто така, средствата се 100 отсто реализирани. И уште да потенцирам дека алатката што ја извади Министерството за финансии, е одлична можност да се види во делот на ресорите кој колку ги реализирал капиталните нвестиции. Бидејќи јас како министер сум бил најчесто прозиван за капитални инвестиции. Кога одам на некое телевизиско интервју, на пример, позади мене на слика стојат патишта, а тие не влегуваат во овие 420 или 370 милиони евра капитални инвестиции. Значи тие се посебно, но и таму реализацијата е одлична. 

За пругата кон Бугарија, последните најави беа дека до крајот на годинава ќе се избере изведувач на втората фаза, а конкретни градежни работи на терен се очекуваат на стартот на 2020 година. Неодамна од бугарска страна беше нагласено дека тие имаат да доизградат уште само 2,5 километри од својот дел, а остатокот планираат да го модернизираат. По долги 25 години, во кои таа пруга веќе се претвори во анегдота, Ве молам кажете ми до каде се работите и кога ќе биде готова, кога ќе се возиме со брзи возови од Скопје до Софија?

Сугарески: Точно е дека беше во најава. Делот од Куманово до Бељаковце, имаме зголемена реализација. Кога дојдовме на власт во 2017 година реализацијата беше неполни 20 отсто, сега е преку 50 проценти, значи имаме забрзување, иако можеби недоволно. Очекувам дека тој дел наредната година комплетно ќе биде завршен. За вториот дел, од Бељаковце до Крива Паланка, евалуацијата е во тек, тоа го прави ЈП МЖ Инфраструктура. Очекувам наредната година да заврши таа евалуација и веднаш да почне изградбата. За третата делница се работи на обезбедување на средства. Знаете дека таа е 23 километри и е со многу сериозна и специфична конфигурација на земјиште, со голем број на тунели и мостови, и ќе чини сериозна сума пари. Така што, очекувањата ми се дека нејзиното стартување треба да биде од 2021 година. А Меморандумот што е склучен со Бугарија е нашиот дел целосно да биде завршен до 2025 година.

Во моментов има градежни работи за комплетирање на примарниот гасоводен систем, со кој треба да бидат поврзани сите поголеми градови во земјава, но тоа досега е готово само на потегот од Клечовце до Неготино. Се уште се во фаза на градба од Неготино до Битола, и од Скопје до Гостивар. Кога се очекува тие да бидат оперативни?

Сугарески: Да расчистиме една дилема. Кај гасификацијата има 90 отсто реализација, не само техничка, туку и финансиска, средства кои се потрошиле годинава. Тоа е преку милијарда и триста милиони денари. На кракот од Неготино до Битола има сериозна динамика на активности. Тоа е видливо. И не е до половина, туку многу повеќе направен. Очекувам наредната година да бидат завршени двата краци, и од Неготино до Битола, и од Скопје до Гостивар, преку Тетово. Административните работи и експропријациите се во најголем дел решени, останати се само по неколку парцели за решавање. Кракот од Неготино до Битола, кога дојдов за министер во јули 2017 година, немаше направено ни експропрјација кај 98 проценти, а камоли да се гради нешто. А наредната година е предвидено да почнат проектите Гостивар – Кичево и Велес-Свети Николе.

Владата пред неколку месеци објави дека бара приватен партнер со кого заедно би ја граделе секундарната дистрибутивна мрежа преку која природниот гас би можел да стигне до домаќинствата. Кога сите граѓани ќе добијат шанса да се греат на гас, и колку ќе ги чинат приклучоците, дали тие нема да им бидат огромен трошок?

Сугарески: Точно е, Владата побара приватен партнер. Очекуваме во најбрз временски период да се распише тендер за тој партнер да помогне во делот на секундарната гасификација. Така што, битно е наредната година да го завршиме примарниот гасовод за да може да се вклучат сите тие 17 општини на него. Најголемиот дел од општините, од она што го разговарам со градоначалиците, веќе имаат проектни документации, а дел им се во завршна фаза, така што очекуваме веќе во 2021 да се работи на нив и да можат да се приклучат. Прво претпоставувам дека на гас ќе се приклучат институциите, па потоа домаќинствата.

Значи тоа сепак нема да биде многу брзо?

Сугарески: Видете, оваа држава не постои од јули 2017 година. Овие се напластени проблеми. Јас не сакам да барам алиби. Но морам да кажам дека на кракот Неготино Битола најдовме само ископани дупки, а беше презентирано дека силно се гради гасовод. Сега работиме интензивно, техничката и финансиската реализација оваа година е многу силна, и тоа е многу видливо на терен.

Автопатот Кичево Охрид ќе не чини дополнителни 187 милиони евра, кредит кој ќе се земе од ЕКСИМ банката. Мораше ли да се земе заем токму од Кинезите, кои го одобрија првичниот кредит. Не можеше ли да се најде друг институционален финансиер, како ЕБОР, ЕИБ и други?

Сугарески: Тоа ми е едно од најодговараните прашања откако сум министер. Јас често пати кажувам дека вакви „утки“ градежништвото во светот не памети никаде, и го тврдам тоа, иако не сум градежен инжинер или архитект. Тоа уште кога седнав на ова сточлче ми беше јасно кажано од директорот на ЈП за патишта, но и од надзорот, за сите проблеми – неусогласеност на проектната документација со реалната состојба на терен, немањето клучки, алтернативни патишта, нерешени еден куп експропријации, дислокации на енергетски објекти. Посебно ќе го нагласам и делот на тунелот, кој бил тогаш предвиден со земјиште втора или трета категорија, а завршува со петта и шеста, тоа изискува сериозна сума на пари. Сега во Собрание ќе носиме нов анекс за усогласување на грдењето со делот на финансирањето. А финалниот рок што си го зададовме - останува, автопатот треба да заврши до јуни 2021 година. Со тоа што, наредната година ќе се направи обид барем некои 15 до 20 километри – делот од Охрид до Врбјани, се разбира оние што ќе бидат готови, да бидат пуштени во употреба. Имаше над 70 препроектирања и голем дел од нив се завршени, така што се расчистени и на голем дел од теренот сега може да се работи.

ДО СРЕДИНАТА НА 2021 ГОДИНА СИГУРНО ЌЕ БИДЕ ЗАВРШЕН КИЧЕВО-ОХРИД

Но да расчистиме, мораше ли да се зема кредит од Кинезите, и какви се условите на тој заем?

Сугарески: Владата беше пред дилема дали сето ова да се прекине или да се продолжи. Но, на крајот, ние не можеме да останеме без автопат, и да платиме на арбитражи еден куп пари. Затоа го продолживме проектот. Но цените по кои е правен анексот, се три пати пониски од оние кои беа претходно. И, ова се проценките, што не значи дека сите пари ќе бидат потрошени.

Опозицијата обвини дека кога вие бевте во опозиција велевте дека автопатот е промашен, но сега ништо не сте смениле, како и дека таму речиси ништо не се работи. Која е вистината, се исправија ли грешките, се работи ли на автопатот, колку досега е завршен, и дали до средината на 2021 година ќе биде завршен како што се ветува?

Сугарески: Нормално е опозицијата да критикува, и тоа и е и работа, некогаш основано, некогаш неосновано. Кога дојдовме, автопатот имаше реализација околу 40 проценти, сега е над 57 проценти. На терен се работи. Голем период се задоцни заради то што неа беа обезбедени средствата, голем дел заради временските услови. Но, сега сите проблеми се решени и со серизен прогрес мора да се работи. Знам дека се гради автопат, а не некое уличе или патче од 150 до 200 метри и можат да излегуваат проблеми и во од. И ние нив се обидуваме да ги решаваме. Кога зборуваме за проектите, мора да кажеме дека парите ги даваат граѓаните, тие пари не се ниту на СДСМ ниту на ВМРО-ДПМНЕ, ниту на ДУИ. Граѓаните посакуваат да има автопат таму, и тоа е најбитно. Воопшто не е битно кој почнал, а кој завршил. Бидејќи и проекти што ги почнува оваа Влада, и наредната Влада, која и да е, треба да ги заврши. Така што, нема - овој проект е ваш, а овој е наш, тоа не постои. За многу од овие проекти што ги поставувате како прашања, проектите се стари и по15 до 20 години. И затоа и многу од работите оттогаш се изменети. Затоа во Кичево има проблеми со резервоарот на вода. Тогаш тие работи не се гледале.

Многу критики има за автопатот Скопје - Блаце, чија изградба се уште не е почната, а беше најавувана за многу одамна. За уште помалку од 13 километри нашата земја се уште не може да се поврзе со автопат до Косово, а неодамна во таа држава го пуштија последниот дел од нивната страна од автопатот Арбен Џафери, со што од нашата граница, па до Приштина, ќе се патува само по автопат. Зошто толку се задоцни?

Сугарески: Мислам дека за првите два километри тендерот во Јавно претпријатие за патишта завршува. Пааралелно се работи и на проектирање на наредните 10 километри и тоа идната година треба да биде готово. Тој проект постои повеќе од 15 години, и ако ние сега градиме по тој проект, треба да влеземе во зоната Визбегово и во гробиштата во Бутел. Затоа мора да се нправат измени во тој проект. За да не се губи на време, прво ќе се оди со изградба на првите два и пол километри, а паралелно ќе се проектираат и другите 10 километри. Кога се проектра автопат, потребни се меѓу 18 и 24 месеци, само за проектирање, а да не зборуваме за изведбата и решавање на голем број на експропријации. За првите два километри очекуваме во најбрз временски период да почне изградбата. Со интензивна работа би требало да бидат изградени најдоцна за една до една и пол година, може и побргу. А за наредните десет километри се планира наредната година да заврши проектирањето. И со самото завршување на тие два и пол километри, веднаш да се надоврзат со завршениот проект и тие 10 километри.

Значи кога ќе бидат готови сите тие 12,5 километри?

Сугарески: Тој автопат целосно ќе биде готов до 2023 година, а јас очекувам и побрзо.

Додека бевте пратеник на тогаш опозициската СДСМ, имавте еден интересен настап во Собранието, кога претходната власт ја критикувавте за задолжувањето. Тогаш рековте „се е на кредит во оваа држава“. Но, и Вашата влада продолжи да зема кредити, па политичките ривали секојдневно ве прозиваат дека им трупате голем борч на идните генерации. Дали е точно дека и оваа влада не успева да излезе од тој магичен синџир и има ли опасност од толку високите задолжувања?

Сугарески: Тука има две работи. Прво, нема никакви опасности. Како опозицијата ќе создаде перцепција кај јавноста дека ние како држава се задолжуваме, ако не критикува постојано. А тие критики не се основани, односно далеку од тоа дека сме презадолжени. Напротив, државата е сериозно финансиски стабилизирана, а голем дел од капиталните проекти се прават и од буџетот. Не се сите баш на кредит. На пример, зоната во Визбегово, канализации, водоводи, канализацијата во Арачиново, и еден куп други проекти што ги има министерството, се финансираат од буџетски средства. За критиката што како тогашен опозиционер сум ја давал, било исклучиво за тоа што се граделе споменици, непродуктивни работи, врби и други глупости, А не се одвојувале средства за продуктивни капитални проекти. Инаку, за сите задолжувања за продуктивни капитални објекти, ние сме гласале „за“. Тоа може лесно да се провери во стенограмите и во гласањата во Собранието. А еве, за да објасниме за што ние се задолжуваме, видете го растот во градежништвото, каде сме стартувале, а до каде сега сме дојдени. Во третиот квартал, во тие 3,6 отсто раст на БДП, рударството и градежништвото се во првите што го креваат процентот, особено во делот на нискоградбата. Така што, има разлика. Еве на пример, има еден проект кој што во моментов го брани министерката за финансии, а се однесува на локални патишта, во износ од 70 милиони евра кои ги земаме од Светска банка. Тој проект е цела година работен во Министерството за транспорт. И јас мислам дека не постои никој кој може да го оспори, бидејќи ние како Влада така ќе им помогнеме на општините во делот на комуналната инфраструктура, за да се решат голем број на реконструкции и рехабилитации на локални патишта и улици.

Кога во мај се заговараше владината реконструкција, или популарно наречената метла, дел од медиумите пишуваа дека вие сте еден од министрите што треба да си заминат од Илинденска. Имаше ли вистина во тие најави, дали нешто такво воопшто ви беше споменато од премиерот Заев или од некого во партијата?

Сугарески: Јас тогаш одговарав дека станува збор за оценка на премиерот за активностите што ги имам како ресорен министер. Не сакав директно да одговарам дека станува збор за шпекулации. А ниту такво нешто ми рекол премиерот, ниту било кога беше поставено како прашање мое заминување од Владата.

Концесионерот ТАВ нема да го гради карго аеродромот во Штип, но во замена требаше да и исплати на Владата околу 40 милиони евра, како што беше предвидено со договорот. До каде е со таа постапка и за што ќе се наменат тие пари?

Сугарески: Во моментов има закон во Собрание предложен од Министерството за економија, кој се однесува на измена на законот за јавно-приватни партнерства и концесии. Со таа измена се дава можност - доколку анализата, која веќе се работи, покаже дека нема да може да биде изграден карго аердромот, најголем дел од тие средства што биле предвидени за него, нешто над 40 милиони евра - да бидат потрошени во делот на водоводи, канализации, градинки, училишта, болници и се она што е јавен интерес за нашите граѓани.  А очекуваме анализата да покаже дека карго аеродромот не треба да се гради. Карго аеродромот не е во игра и ние очекуваме дека откако ќе биде донесен законот во Собранието, да се склучи анекс со ТАВ, и да се користат тие средства.

Дали сте задоволни од ефектот на продолженото субвенционирањето на Визер, кои ќе добиваат владини пари уште три години за евтините летови?

Сугарески: Задоволен сум. За нас тогаш приоритетна цел беше како да заживее Охридскиот аеродром, и ние на тоа инсистиравме при склучувањето на уредбата, па затоа два пати паѓаше тендерот. А сега тоа никој не го споменува. Мислам дека Охридскиот аеродром сега е трет и во Европа по број на прелети. А и линиите што се одбрани, иако тоа е деловна политика на Визер и не е наша работа, наидоа на огромен интерес кај граѓаните. И мислам дека вредеше таа уредба што ја донесе Владата.

Значи се откажуваме од национален авиопревозник?

Сугарески: Видете. Сите анализи што се прават покажуваат дека тешко дека ќе се оди на национален авиопревозник, бидејќи се негативни.

СИГУРЕН СУМ ДЕКА ПО ИЗБОРИТЕ НИЕ ЌЕ ФОРМИРАМЕ ВЛАДА

Избори ќе има на 12 април. Ќе остане ли Вашата партија на власт, бидејќи според одредени информации од опозицијата, анкетите покажуваат нивна предност? Дали очекувате дека повторно ќе правите влада?

Сугарески: Апсолутно очекувам и сигурен сум дека оваа гарнитура ќе остане.

На што го темелите тој оптимизам?

Сугарески: На она што значи решавање на голем број проблеми. Не сакам да бидеме со кратко паметење и да заборавиме дека во оваа држава до 2017 година имаше сериозна политичка криза, и вие тоа добро го знаете. Сега државата е стабилизирана по сите основи. Очекуваме во следните еден до два месеци да стане и формално членка на НАТО, очекуваме и датум за добивање преговори со Европската унија. А треба да се потенцира и стабилизирањето на државата од финансиски аспект. Низ овие години донесовме бројни мерки како Влада од аспект на решавање на проблемите на граѓаните – минималната плата од 9.500 денари се зголеми на 14.500 денари, враќањето на евтината тарифа на струјата, укинувањето на екстерното образование, субвенционирањето на фирмите, зголемувањето на платите во администрацијата, во здравството, кои со новите зголемувања ќе бидат сериозно големи, во образованието, пензиите, субвенциите во земјоделството...

Дали на тој начин Владата со буџетот за идната година си купи поддршка?

Сугарески: Не. Знаеме дека дури во октомври годинава се одреди датумот за предвремени избори. А нашиот став претходно беше дека оваа гарнитура треба да остане до октомври, 2020 година, односно тогаш да се одржат изборите. Поради ситуацијата што не се доби датум за преговори, се покажа дека ние треба да одиме порано на барање поддршка од граѓаните. Инаку, јас сум член на Економскиот совет и уште пред неколку месеци, значи уште пред да се знае дека ќе има вонредни избори, кога Економскиот совет заседаваше и ги гледаше сите параметри, јасно беше дека имаме простор за тие зголемувања. Знам дека излегува оти сите мерки ги воведуваме откако се распишаа изборите, но не е така. 

Ако повторно како на минатите избори бидете со неколку пратеници помалку од ВМРО-ДПМНЕ, очекувате ли дека ДУИ пак Вас ќе ве избере за коалиционен партнер?

Сугарески: Јас не би правел предвреме такви шпекулации. Јас очекувам дека оваа гарнитура ќе продолжи да управува со државата.

Нина Нинеска-Фиданоска