Интервју со Дарко Булдиоски - AllWeb конференцијата е чекор пред пазарот, сакаме да инспирираме нови идеи

Добивај вести на Viber

На 18 ноември ќе се одржи 5-тата AllWeb конференција за дигитален маркетинг која ќе донесе голем број на квалитетни предавачи со интересни и корисни презентации. Тимот на AllWeb успеваше да презентира голем број на нови идеи, можности за поврзување и споделување на искуства, знаење и стратегии што е неопходно за развој на бизнисот во модерната дигитална ера. За годинешната AllWeb конференција разговараме со Дарко Булдиоски и што се посетителите ќе можат да дознаат и научат.

Фактор: Наскоро ќе се одржи уште една AllWeb конференција петта по ред во Скопје со што ќе се обележи и мал јубилеј. Дали ги постигнавте почетните замисли, што денес претставува AllWeb?

Булдиоски: Она што го посакувавме пред 5 години и она каде ја гледаме AllWeb денес секако дека се разликува. Насоката е таа, но секоја година како што конференцијата оди напред така и плановите за во секоја следна година одат напред. Задоволни сме од постигнатото, не сакаме да гледаме оваа година како на јубилеј затоа што има уште многу да се работи. Сакаме и до сега сме успевале конференцијата да биде чекор пред пазарот, да ги најавува трендовите, добрите пракси и да им биде инспирација на локалните компании, организации, агенции и медиуми.

Фактор: Годинава имате обезбедено говорници од различни области, медиуми, комуникации, маркетинг и од бизнис секторот. Која ќе биде главната цел на AllWeb 2016, на што ќе биде ставен фокусот?

Булдиоски: Секоја година се трудиме да покриеме што е можно повеќе актуелни теми, а притоа да имаме еден нишка која ќе ја врзува целата програма. Оваа година таа нишка се мобилните корисници односно подобро речено сите ние зависници од паметните уреди од кои не се двоиме ни додека спиеме. Конкретните теми опфаќаат огласување, содржина, аналитика, транформација, технологија, social, big data…

Фактор: Кои се главните придобивки за учесниците на AllWeb, што тие може да научат. Какво е досегашното искуство од поврзувањето на професионалците, компаниите и организациите?

Булдиоски: Конференцијата до сега делувала инспиративно и пред се едукативно на публиката. Преку споделените презентации и примери публиката има шанса да научи некои нови стратешки пристапи но и многу практични детали од светот на маркетингот. Вмрежувањето е нешто на што ние посветуваме многу внимаение затоа што тоа особено му треба на нашиов пазар. За жал истото е малку потценето пред се затоа што сме водени од пристапот дека се си знаеме и сите ги знаеме, а всушност постои многу поголем потенцијал ако се одработи заедно нешто поголемо, поиновативно. 

Фактор: Што би им порачале на сите кои сакаат да се занимаваат со дигитален маркетинг или пак да ги искористат модерните алатки за промоција, како AllWeb искуството може да им помогне?

Булдиоски: Денес не можеш да размислуваш за маркетинг а да не размислуваш за дигитален маркетинг. Постојат повеќе суштински надградби (разлики) помеѓу сфаќањата на традиционалниот и новиов маркетинг. AllWeb е тука да ги расчисти тие дилеми и да го подготви секој професионалец да знае во која насока треба да го развива своето професионално знаење.

Христијан Станоевиќ