ИНТЕНЗИВНА И ИНФЕКТИВНОТО ОДДЕЛЕНИЕ ВО „8 СЕПТЕМВРИ“ ПОЛНИ: Го празнат и пулмолошкото за пациенти болни од ковид, д-р Костов за Фактор

Добивај вести на Viber

Во ковид-центрите во Македонија се лекуваат повеќе од 700 пациенти поради компликации од корона вирусот, и иако најголем притисок има во Клиничката болница Тетово, каде се хоспитализирани околу 110 лица, како и во Гостивар каде се лекуваат околу 90 пациенти, се полнат и болниците во Скопје. Директорот на ГОБ „8 Септември“, д-р. Христијан Костов во разговор за Фактор вели дека кај нив се сместени 49 пациенти. Сите се со тешка и средна клиничка слика.

-Во моментов во „8 Септември“ хоспитализираните пациенти се лекуваат на одделението за интензивна нега каде има 23 болнички кревети, како и на инфективното одделение, каде капацитетот е 26 кревети, што практично значи дека веќе нема места на овие две одделенија. Во очекување на нови пациенти, на кои им е неопходно болничко лекување, пациентите кои лежат на Одделението за пулмологија, а има околу 20-тина, ги префрламе, дел на Клиниката за пулмологија, дел во центарот за рехабилитација, „Јасен“. Тоа се пациенти кои не се заразени со вирусот, вели д-р Костов.

Истовремено нагласува дека најголемиот број од луѓето кои се лекуваат во оваа здравствена установа се од Тетово, Гостивар, Куманово, Кичево, Струмица..., онаму, како што вели, каде што процентот на вакцинирани е навистина мал. Но, вели дека од хоспитализираните има 16 пациенти кои се вакцинирани со двете дози.

-Сите 49 пациенти се со тешка и со средна клиничка слика. 16 од нив ги примиле двете дози од вакцината против корона вирусот, но во моментов не располагам со податоци за тоа која вакцина ја примиле и колкав период е изминат по примањето на втората доза. 6 од нив ги третираме на одделението за интензивна нега, а 10 се сместени на инфективното одделение. Сепак, сакам да потенцирам дека овие пациенти, за разлика од останатите 33, имаат средна клиничка слика. Инаку, четири пациенти се на сипап апаратите, но и останатите се кислородно зависни, потенцира д-р Костов.

Директорот на ГОБ „8 Септември“ се надева дека нема да дојдат до степен, повторно целата болница да стане ковид-центар, како што беше случај лани во летниот период, а потоа и во есенските и зимските месеци.

-Дефинитивно ја празниме пулмологија, но јас искрено се надевам дека нема на сите одделенија поворно да се лекуваат само пациенти болни од корона вирусот. Во моментов ги враќаме лекарите и останатиот медицински персонал, медицински сестри и болничари, од нивните годишни одмори, кои ги користат дури сега по година и пол неисцрпна работа. Се подготвуваме за тежок период, но повтрно ќе кажам, дека се надевам дека нема да дојдеме до оној максимум и од 180 пациенти, кои тука се лекуваа од комликациите на корона вирусот, вели д-р Костов.

Инаку, бројот на активни случаи во Македонија, заклучно со вчерашниот ден изнесува 11.042. Вчера, пак, бројот на починати беше дури 27, со што вкупниот број сега е 5.695. Повторно, најголем број новозаразени со корона вирусот се од Скопје, Гостивар, Куманово...

Владата апелира на што помасовна и побрза вакцинација против корона вирусот, заради што вчера и официјално го најави стартот на кампањата за имунизација „Вакцинирај се“.

Анита Буховски