ИМА ЖРТВИ: Силно невреме ја зафати Москва
Објавено во: Свет 20 Јуни, 2024
Силно невреме ја зафати руската престолнина. Најмалку две лица загинаа, а 10 се повредени при силно невреме во Москва.
Еден човек загина при уривање на скеле во близина на Московскиот државен технички универзитет Бауман во центарот на градот, потврди денеска претставник на службите за итни случаи на руската престолнина.
„Силните налети на ветерот предизвикаа пад на скелето“, изјави тој за агенцијата РИА Новости.
Изворот појасни дека скелето се урнало на површина од 10 метри квадратни во близина на трикатната зграда кај Московскиот државен технички универзитет Бауман.
Синоптичарите сооопштија дека за само еден час во руската престолнина наврнале 22 мм дожд. Тоа е една третина од месечната норма. Руското Министерство за цивилна одбрана, вонредни ситуации и ликвидација на последиците од природни катастрофи предупреди дека денеска до 22 часот во Москва се очекуваат поројни дождови и силен ветер, како и можност за торнадо во следните часови. Во Москва беше објавено портокалово 10-то ниво на опасност поради лошите временски услови, бидејќи налетите на ветерот достигнаа и до 25 метри во секунда.
Поради лошото време во руската престолнина, парковите и фестивалските платформи се затворени, а службите за итни случаи на градот работат во засилен режим и брзо ги отстрануваат паднатите дрвја и ги демонтираат постројки оштетени од ветрот.
Московските аеродроми „Шереметјево“, „Внуково“, „Домодедово“ и „Жуковски“ работат нормално и покрај поројниот дожд и лошото време. Не се пријавени доцнења или откажувања на летови.
Лани летото, при невреме силен ветер откорна 70 дрвја во Москва, а голем број автомобили беа оштетени.