Има се, може се! Која хотелска компанија во акции и обврзници вложи 1,3 милиони евра?

Добивај вести на Viber

Кога се знае како и се има со што полесно се пребродува корона кризата. „Македонијатурист“ лани вложи во акции и обврзници, а од дивиденди на своите акции наплати 439.000 евра, а од камати на депозитите уште 342.000 евра од камати

„Македонијатурист“ лани вложи 1,29 милиони евра во обврзници и во акции,покажуваат официјалните податоци од паричниот тек на најголемата македонска хотелиерска компанија која е и една од корпорациите пионери во вложувања во хартии од вредност.

Неможноста за деловно работење предизвикана од бројните ограничувања и забрани заради корона кризата врз хотелиерско-угостителскиот бизнис „Македонијатурист“ ја искористи за реновирање на својот најдобар хотел „Холидеј Ин“, но и за вложување на свои финансиски средства и нивно оплодување во корпоративни обврзници (должнички хартии од вредност) како и за вложување во акции (сопственички хартии од вредност).

Во годишниот извештај за работењето во 2020 година, достапен на веб сервисот СЕИ НЕТ на Македонска берза, „Македонијатурист“ потврди дека лани интензивно вложувања кеш во: корпоративната (втора по ред) обврзница на ТТК Банка како и во акции со право на глас од три домашни деловни банки. „Македонијатурист“ лани купила 2.000 акции од „Комерцијална банка“ (просечната годишна цена на таа акција лани изнесува 6.590 денари што значи апроксимативно вложување на 214.300 евра). Хотелиерската компанија вложила и во 518 акции на НЛБ Банка (просечна годишна пазарна цена на таа акција лани била 17.138 денари што значи апроксимативно вложување на 144.300 евра) и во 2.700 акции на ТТК Банка (просечна годишна цена од 1.377 денари што укажува на вложување вредно 60.400 евра). Според просечните пазарни цени „Македонијатурист“ во трите акции на банки лани вложила околу 420.000 евра, а уште 870.000 евра (апроксимативно) пласирала во корпоративната обврзница на ТТК Банка (која дава годишна каматна стапка од 2,7 отсто и рок на доспевање од 6 години).

„Македонијатурист“ е една од предводниците на корпоративниот сектор по вложувања во сопственички, а сега и во должнички хартии од вредност. Билансот на состојба покажуав дека на крај на 2020 година „Македонијатурист“ во хартии од вредност чува 7,26 милиони евра што е за 33 отсто повеќе од 2019 година. Во краткорочни вложувања (читај депозити во банки н.з.) компанијата на Доне Таневски, Соња Бибановска и Григор Копров чува над 15 милиони евра што е за 8 отсто помалку од 2019 година.

Корона кризата најсилно се одрази врз хотелиерско – угостителската индустрија и тука не беше исклучок ниту „Македонијатурист“ која по многу години за прв пат лани заврши со загуба поголема од половина милион евра.