Има ли милионери во Кратово?
Објавено во: Економија 06 Февруари, 2020
Градот чиј синоним во неговата понова историја е РИК „Силекс“ и неговиот долгогодишен директор и мнозински сопственик Љубисав Иванов Ѕинго, последниве години опстојува во скромен економски амбиент. Кратовската економија има само три генератори кои во 2018 година успеале да создадат приходи кои надминуваат еден милион евра. При тоа само една од тие три фирми кои се сопственост на РИК „Силекс“ остварила добивка, а другите две работеле со загуба
Можеби не е највисокиот град на Балканот иако е веднаш до него, но има долга, богата и славна традиција и историја. Кратово, заборавената мала градска населба распослана на вулкански карпи на кои расте лозје од кое се прави уникатно вино, град запашан со букова и борова шума. Градот на златари со вековна традиција, градот на камените мостови и турските стражарски кули. Кратово, градот во кој е роден големиот светител Ѓорги Кратовски кој многу млад, но непокорен избрал да умре попрво отколку да ја промени својата христијанска вера. Кратово е град на првиот македонски министер за правосудство, легендарниот гемиџија, еден од основоположниците на независната македонска држава – Павел Шатев, великанот што го преживеа заточеништвото во Фезан во најзафрлената пустина во Либија, човекот кого не го покорија ниту српската и бугарската чизма, но му пресудија своите во неговата независна Македонија во која поживеа само четири години. Градот на уникатниот травертин камен, на прочуените пастрмајлии и неколку вековните борови кои сведочат за многу изминати години. И конечно градот што триесетина години живее во сенката на семејството предводено од Љубисав Иванов – Ѕинго можеби и најмоќниот, а сигурно најдолговечен магнат на македонската транзиција. И секако Кратово – градот на едиствениот македонски фудбалски прволигаш „Силекс“ кој е единствен клуб што од 1992 година досега , од независноста на Македонија, игра во Првата фудбалска лига,а три пати ја освојувал и титулата првак на Македонија.
Кратово бил град на силна индусрија генерирана од РИК Силекс. Сега Кратово е град во кој има само три компании кои имаат приходи повисоки од 1 милион евра.
Кои се тие?
Силпен СТ е најголемата кратовска фирма. Оваа компанија произведува хемиски производи поточно го произведува познатиот кратовски сунѓер. Оваа компанија во 2018 година остварила приход од 6 милиони евра, а годината ја завршила со добивка од 7.200 евра. Оваа компанија е сопственост на РИК Силекс.
Следна на листата е повторно фирма на РИК Силекс. Станува збор на Силекс Неметали. Нејзиниот приход во 2018 година бил 1,26 милиони евра,а загубата од работењето изнесува 172.000 евра. Фирмата е регистрирана за изградба на нискоградни.
И третата фирма која остварила приход поголем од еден милион евра, погодувате припаѓа на РИК Силекс. Тоа е малиот, но импозантен хотел кој е украс на градот станува збор за Хотел Силекс. Ова друштво лани остварило приход од 1,1 милиони евра, но годината ја завршило со загуба од работењето во износ од 79.000 евра.
Р.Ф.