И таткото на министерот Благој Бочварски во бизнисот со струја

Добивај вести на Viber

Регистрација на фирми за производство на електрична енергија од страна на најблиски членови од семејствата на актуелни и поранешни членови на Владата е тренд кој не запира во последно време.

Таткото на министерот за транспорт и врски Благој Бочварски, Венцислав Бочварски од Штип, е управител на новоформираната фирма за производство на електрична енергија Техно Енерџи.

Сопственик на новата фирма од Штип е Техноинвест Штип, претпријатие кое се наоѓа на истата адреса на која живее и Венцислав Бочварски. Формата е регистрирана со почетен влог од 442.800 денари со поднесено барање за основање на 10 јануари.

Досега единствената фирма на таткото Бочварски која беше позната во јавноста е Де Лукс Доо, споменувана во критиките на опозицијата дека учествува на јавни набавки додека синот Бочварски извршува функции.

Досега имаше сознанија дека како основачи на фирми за производство на електрична енергија се јавуваат имиња на најблиски од врвот на власта, а последен во низата сега е и родителот на поранешниот градоначалник на Штип.

Не е познато со какво производство на струја ќе се бави Техно Енерџи на Бочварски, но во тренд се обновливите извори на енергија, особено фотонапонските централи. Високите цени на слободниот пазар се атрактивни за голем број на инвеститори во последно време.

Александар Кузмановски