ХРАНА, ОБЛЕКА, ОБУВКИ: Што се поскапе во октомври?
Објавено во: Економија 07 Ноември, 2017
Трошоците за живот и цените во малопродажбата во октомври годинава се зголемиле за 0,3% во однос на претходниот месец.
Oвој податок е наведен во соопштението на Државниот завод за статистика (ДЗС).
Голем пораст на цените има во категоријата прехранбени производи, односно забележано е поскапување на оризот за 3,6%, на компирот за 3,2%, на млекото и на јогуртот за 1,9%, на сувото овошје и на јаткастите производи за 1,8%. Шеќерот, џемот, медот, чоколадата и кондиторските производи поскапеле за 0,9%, месото за 0,8%, а другите пекарски производи и другите прехранбени производи за 0,5%.
Во октомври, има раст на индексите на трошоците на животот. Ова се забележува кај течните горива за домаќинствата за 6,2%, обувките за 4,2%, кај автомобилите за 3,9%, болничките услуги за 2,6%, гасот за домаќинствата за 2,2%, течните горива и мазива за сопствени сообраќајни средства за 2%, стоматолошките услуги за 1,7%, теписите и другите покривки за под за 1,3% и кај облеката за 0,5%.
Намалување на индексите на трошоците на животот во октомври 2017 година, во споредба со претходниот месец, е забележано кај свежото и разладеното овошје за 7,4%, замрзнатото овошје за 1,8%, свежиот и разладениот зеленчук освен компирот и другите коренести плодови за 1 процент и кај јајцата за 0,9%.
Ако се спореди, за период од една година, зголемувањето на трошоците за живот и на цените е многу поголемо. Индексот на трошоците за живот во октомври 2017 година, во споредба со октомври 2016 година, пораснал за 1,9%, а индексот на цените на мало бележи пораст за 4,3%.