Добивај вести на Viber
Од каде заинтересираноста на странските компании за Макпетрол? Одговорот е едноставен. Групата Макпетрол е можеби најдоходовна во Македонија, со приходи кои надминуваат 300 милиони евра годишно. Што е исто така значајно, главно станува збор за пари кои фирмата ги генерира во готовина, од бензинските станици. што значи нема проблем со ликвидноста.
Лани групата „Макпетрол“ (значи малопродажба на деривати, продажба на возила, компјутери, национална телевизија и други деловни активности што обединува групата) генерирала 18,44 милијарди денари кеш. Тоа е вкупниот приход. Фирмата секојдневно просечно лани имала приход од 50,5 милиони денари што е речиси 900.000 евра дневно.
Во 2014 година износот на вкупните приоходи бил 20,43 милијарди денари, а претходната година 21,3 милијарди денари, малку повеќе од лани.
Намалените вредности се резултат на падот на малопродажните регулирани цени на дериватите и на губењето на позициите на „Макпетрол“ во борба со конкуренцијата.
„Макпетрол“ во секој случај е еден од најголемите генератори и агрегатори на кеш во македонскиот финансиски систем. Тоа значи исклучително поволни услови во преговори со банките на нашиот пазар кои сакаат да го опслужуваат „Макпетрол“.
Во групата Макпетрол се специјализираното транспортно друштво ОИЛКО кое има над 80 релативно нови возила за превоз на запалливи материјали. Националната телевизија „Телма“ , чиј рејтинг е во значаен пораст. Макпетрол има лиценци за продажба и увоз за компјутерите „Делл“ и за возилата „Хонда“.