Добивај вести на Viber
Горан Сугарески, кандидатот на СДСМ за градоначалник на Прилеп, се згрозува од статусот на граѓанин на Фејсбук кој му се заканува на неговиот противкандидат од ВМРО-ДПМНЕ, докторот Борче Јовчески, дека „ќе го најде во ендек и помалиот син“.
„Згрозен сум од објавениот фејсбук статус на сметка на личната трагедија на кандидатот за градоначалник на Прилеп од редовите на ВМРО-ДПМНЕ, Борче Јовчески.
Без разлика дали станува збор за вистински или лажен профил, како политичар, но пред се' како човек, најостро го осудувам крајно морбидниот и нехуман чин. Никој нема право да се изживува и да злоупотребува било чија лична трагедија за лични или било какви други интереси.
Во политиката, исто како и во животот, мора да постојат ,,црвени линии" кои не смее да се преминат.
Ова се локални избори кои треба да претставуваат борба на идеи и концепти, а не полигон за дисквалификација на било кој кандидат, од било која политичка опција.
Очекувам надлежните институции да преземат итни мерки, да го откријат сторителот и најстрого да го санкционираат“, реагира поранешниот министер за транспорт и врски и директор на Царинската управа.
Извесниот Роберт Вретоски, кој на социјалните мрежи објавува слики од настани на СДСМ, синоќа му упатил закани за убиство на синот на кандидатот за градоначалник на Прилеп од ВМРО-ДПМНЕ, Борче Јовчески, доколку не ја повлече кандидатурата.
„Наскоро и прислушкуваните разговори за Борчево ке бидат излезени во јавност, па да видите како приватно договара за поткуп на гласачи. Повлекувај се од кандидатура ако ти е мила фамилијата во спротивно ќе го најдеш и помалиот син во некој ендек фрлен како куче“, напишал Вретоски на Фејсбук по што реагираше денеска и Сугарески.