Германија е на чисто со Македонија, ќе ги убедува и другите за Датумот од ЕУ и Поканата од НАТО
Објавено во: Економија 02 Јуни, 2018
Амбасадорот на Германија во Македонија, Томас Герберих, попладнево за „Фактор“ откри дека најбрзорастечката економија во Европа нема ниту една генерална забелешка за нашата земја и е на чисто со ставот дека нашата земја во периодот јуни/јули треба да добие Датум за преговори од ЕУ, кој би бил условен да се реши спорот со името со Грција до крајот на годината, и покана за членство во НАТО.
- Македонија создаде голем политички капитал и тоа Германија не може да не го цени. Затоа, што се однесува до Германија, Македонија може слободно да добие Датум за преговори од ЕУ и покана за членство во НАТО. Во тоа сме сто проценти сигурни - изјави Герберих за „Фактор“.
Тој наведе дека постои извесна доза на скептицизам кај одредени членки во евро-атлантските структури, но дека тие забелешки „се пеглааат“ со компромис.
- Познато е дека Франција и Холандија не се сигурни дека Македонија ги исполнува условите, но јас сум во постојан контакт со нивните дипломати, а пред две недели испратив и писма. Германија не само што ќе ја подржи Македонија, туку ќе ги убедува и другите да ги отворат вратите. Ова се прашања за кои се наоѓа компромис во самата ЕУ - додаде дипломатот.
Герберих очекува уште поинтензивна економска соработка помеѓу Германија и Македонија.
- Германија уште сега има 200-тини наши сериозни инвеститори во Македонија а трговската размена е повеќе од три милијарди евра. Можете да замислите колку ќе се зголеми соработката кога Македонија ќе ги отвора поглавјата за влез во ЕУ и кога ќе му се придружите на НАТО-пактот - вели Герберих.
А.К.