Добивај вести на Viber
Да ја одложи најавената имплементација на пониските единствени цени на лековите и, наместо од 15.10.2012, за кога е најавено, новите единствени цени да почнат да се применуваат од 1.11.2012 година, побара денеска од министерот за здравство Фармацевтската комора.
- Постојат повеќе причини заради кои го упатуваме ова барање, а целта е обезбедување квалитетна имплементација на истите без да се предизвика вештачка дефицитарност од технички причини и нормално снабдување на пациентите со лекови, без застој, објасниваат од Фармацевтската комора.
Тие потенцираат дека пресметувањето на ДДВ се врши од 1 секој месец, и примената на новите цени од 15-ти во месецот, според искуството од март, годинава би било технички тешко изводливо, а проблем ќе има и со софтверското решение во однос на фактурите кои ги доставуваат до Фондот за здравствствено осигурување.
- Согласно договорите со ФЗОМ, аптеката еднаш месечно доставува фактура во периодот од 1 до 10 за целиот претходен месец. Софтверското решение е приспособено согласно Договорот со Фондот и промената на цените во средината на месецот бара временски период за негово усогласување, овие проблеми не би се јавиле доколку примената почнува од 1. во месецот. Со промената на цените ќе се појават и залихи на лекови по стара цена, чие нивелирање исто така бара соодветно упатство и период за прилагодување, изјавуваатод Комората.
Сепак од комората, потенцираат дека го поддржуваат намалувањето на цените на лековите и сметаат дека со новата методологија на пресметување на единствените цени и натаму ќе се намалуваат цените, со што пациентите од сите категории ќе имаат подобар финансиски достап до потребната терапија.