Фабрики за опрема за бојлери и воздушни перничиња добија над 2 милиони евра државна помош

Добивај вести на Viber

Италијанската инвестиција за производство на опрема за бојлери, Кондево од Штип, ја доби првата финансиска помош од Дирекцијата за технолошко индустриски развојни зони во висина од 107 милиони денари (1,75 милиони евра).

Првата државна помош ја доби и американскиот АРЦ Аутомотив од 32,3 милиони денари (530.000 евра), откако во партнерство со кинескиот Јангфенг отворија заедничка фабрика за инфлатори за воздушни перничиња во ТИРЗ Скопје 1.

Двата инвеститори за прв пат добиваат помош од Дирекцијата за следење на работата во слободните индустриски зони, откако нивното доаѓање во Македонија беше најавено уште од 2015, а во тој период добија почетна помош единствено од Владата и од Агенцијата за странски инвестиции.

„Кондево“, која е лоцирана во ТИРЗ Штип, планираше првичната инвестиција од 35 милиони евра да ја зголеми за 50 отсто и да го зголеми број на вработени од сегашните 107 на 150 вработени преку инсталирање две нови високософистицирани линии за нови производи како и да има дополнително зголемување на бројот на вработените со воведување нови производи.

Станува збор за инвеститор кој е еден од лидерите во својата индустрија во светот што ги снабдува најголемите светски производители на бојлери со опрема што се вградува во нив, според претходните впечатоци што ги соопшти Дирекцијата во јавноста.

Американско-кинеска инвестиција на компаниите Јанг фенг и АРЦ беше најавена лани во вредност од 30 милиони евра со над 100 нови вработувања, а производите ќе се извезуваат на европскиот пазар. На свечесноста при отворањето присуствуваа заменик шефот на Мисијата на САД, Ерик Мајер, кинескиот амбасадор Џанг Ѕуо, како и првите луѓе на компаниите инвеститори.

Компаниите во ТИРЗ во јануари годинава реализирале извоз од 275,4 милиони евра што е највисоко ниво во последниве пет години. Во споредба со јануари 2022 извозот е зголемен за 11 отсто, односно за 9 отсто повисок од 2021, и за 45 проценти во однос на истиот месец 2020 година.

Според она што претходно го објави Дирекцијата,  бројот на вработени во зоните во јануари достигна речиси 16.400 што е за 16 проценти повисок од јануари 2022.

А.К.