ЕВЕ ШТО ГИ ЧЕКА АЛБАНСКИТЕ МИГРАНТИ КОИ СО БРОДОВИ ЌЕ СТИГНАТ ВО БРИТАНИЈА: Лондон покренува кампања, огласот ќе биде и на албански јазик
Објавено во: Свет 28 Мај, 2023
Министерството за
внатрешни работи на Велика Британија во наредните денови ќе започне кампања со
која ќе ги советува албанските граѓани да не мигрираат во Британија.
За таа цел е креиран оглас на албански јазик кој ќе им се појави на албанските корисници на Фејсбук и Инстаграм, а во него Албанците се предупредуваат дека во случај на обид за миграција ќе се соочат со притвор или депортација, објави Би-Би-Си.
Владата во Лондон најави дека кампањата ќе започне следната недела и дека ќе биде многу јасно што ги чека мигрантите кои ќе пристигнат со бродови.
Албанците најмногу аплицираат за азил во Британија и до март годинава 13.714 државјани на Албанија побарале да останат на островот.
Според британската полиција, Албанија е „безбедна и просперитетна земја“ и многу националности патуваат низ бројни земји за да стигнат до Британија, а потоа кога ќе пристигнат поднесуваат барања за азил на лажни основи.