ЕУ ПЛАНИРА ДА ВОВЕДЕ ТАКСА ЗА МАЛИТЕ ПАКЕТИ НА ТЕМУ И ШЕИН - повеќе нема да бидат ослободени од царина

Добивај вести на Viber

Европската унија предложи единствена такса од две евра за милијардите мали пакети испратени директно на домашни адреси, кои во моментов најчесто доаѓаат од Кина, објави Би-Би-Си.

Новиот данок би значел дека пакетите во вредност помала од 150 евра повеќе нема да бидат ослободени од царина.

Се очекува надоместокот да го платат онлајн пазарите, вклучувајќи ги кинеските гиганти Тема и Шеин, изјави европскиот комесар за трговија Марош Шефчовиќ.

Минатата година, во ЕУ влегоа 4,6 милијарди вакви пакети, од кои повеќе од 90 проценти дојдоа од Кина.

Шефчовиќ рече дека таков обем создава огромен обем на работа за царинскиот персонал на ЕУ, како и дека претставува предизвик во обезбедувањето соодветни проверки на безбедноста и стандардите на стоките што влегуваат во Унијата.

Предложената такса би „ги надоместила трошоците“, изјави тој пред Европскиот парламент. Брисел, исто така, се надева дека дел од приходите ќе одат во буџетот на ЕУ.

За пакети испратени директно до потрошувачите ќе се применува такса од две евра, додека пакетите испратени до магацини ќе се оданочуваат по пониска стапка од 0,50 евра.

Потегот на ЕУ доаѓа веднаш по новите американски царини за кинески стоки, кои вклучуваат и такса за мали пакети.

По преговорите минатата недела, царината за мали пакети во вредност до 800 долари беше намалена од 120 проценти на 54 проценти. Сепак, фиксната цена од 100 долари по пакет останува.

Постоеја стравувања дека кинеските гиганти за е-трговија би можеле да го преплават европскиот пазар со евтина стока, бидејќи производите првично наменети за САД ќе мора да се продаваат на друго место.

Европските трговци на мало претходно се жалеа дека се соочуваат со нелојална конкуренција од странски конкуренти, за кои тврдат дека не се придржуваат до строгите стандарди за производи на ЕУ.

Шеин и Тему претходно изјавија дека ќе соработуваат со регулаторите и ќе ги почитуваат стандардите за потрошувачите. Тему вели дека има 92 милиони корисници во ЕУ, додека Шеин вели дека има над 130 милиони.

Пред американските царини, платформите како „Шеин“ и „Тему“ се потпираа на таканареченото ослободување „de minimis“ за директно испраќање на производи со ниска вредност до клиентите во САД без плаќање царини или увозни даноци.