ЕСМ се спои со ТЕЦ Неготино откако не успеа да го продаде

Добивај вести на Viber

АД ЕСМ се спои со термоелектраната на мазут ТЕЦ Неготино во спогодба на присоединување на трговски друштва што ја иницираше Владата. Претходно ТЕЦ Неготино работеше како засебен субјект во владина сопственост.

Претходно, на крајот од 2022, Владата ја задолжи Електрани на Северна Македонија да почне постапка за изработка на физибилити студија за јавно-приватно партнерство или за продажба на ТЕЦ Неготино. Проценка на неговата вредност направи и Бирото за судски вештачења, но идејата за приватно менаџирање на мазутарата која претходно работеше како ладна резерва не се реализира.

Пазарните цени на електричната енергија на регионалните берзи и домашниот континуиран недостиг на домашна струја од термоблоковите на РЕК Битола на голема врата го вратија во игра заборавениот и по многумина отпишан ТЕЦ „Неготино“.

Владата со доаѓањето на енергетската криза на крајот од 2021 му даде дозвола на ЕСМ да го ангажира ТЕЦ-от, да му го плаќа мазутот и да му ја превзема произведената струја. МЕПСО му ги плаќаше трошоците за плати на повеќе од 200 вработени и одржување на постројките и за тоа издвојуваше над 3 милиони евра годишно. Подоцна, Државниот завод за ревизија утврди дека овие пари биле исплаќани за ТЕЦ Неготино да биде подготвен за вонредно вклучување во секое време, но тоа не се случило кога настапила енергетската криза.

ТЕЦ Неготино е најмaлата и најмалку користена термоцентрала во Македонија. Според официјални достапни податоци од 1995 година до 2008 година произвела вкупно 1.385 гигаватчасови струја (за да биде појасно тоа е количина што само еден блок на РЕК во добрите денови ја произведувал за само една година). Последната година, пред повторно да биде рестартиран, во која ТЕЦ Неготино работеше на потребите на електроенергетскиот систем е 2008 -та кога е ангажиран во месеците јануари и февруари.

ТЕЦ Неготино оваа година, според планот за 2023, треба да набави мазут во вредност од 200 милиони евра. Генерално, мазут за оваа термоелектрана се набавува од РКМ на Ратко Капушевски, кој подоцна стана партнер со Ерџан Сулкоски, бизнисмен од Кичево близок со Пуцко Петрол и ДУИ. Снабдувачот РКМ минатата година прикажа повеќемилионска добивка и огромни приходи.

А.К.