ЕРДОГАН ИМА ОГРОМНА ПРЕДНОСТ ПРЕД КИЛИЧДАРОГЛУ: Први прелиминарни резултати од изборите во Турција

Добивај вести на Viber

Актуелниот претседател на Турција Реџеп Таип Ердоган би можел да добие нов мандат на таа функција, покажуваат првите прелиминарни податоци од денешниот втор круг од претседателските избори во Турција.

Според 49,39 отсто од преброените гласови, Ердоган води со 56,36 отсто од гласовите наспроти опозицискиот кандидат Кемал Киличдароглу, кој освои 43,64 отсто, јавува Турската радио-телевизија (ТРТ).

Според досегашните податоци, излезноста била 84,74 отсто, а гласале најмалку 24,1 милион граѓани.

Избирачките места се затворени во 17 часот по локално време.

Кандидатот на опозицијата за претседател на Турција, Кемал Киличдароглу ги повика своите приврзаници да останат блиску до избирачките места и да внимаваат на гласачките кутии, со оглед дека „овие избори се одржуваат во многу тешки околности“.

-Изречени се секакви клевети, но јас верувам во здравиот разум на граѓаните. Демократијата сигурно ќе дојде во оваа земја, слободата ќе дојде и кај нас - рече тој по гласањето.

Актуелниот претседател Реџеп Таип Ердоган исто така ги повика своите приврзаници да останат до крај на избирачките места и ги повика граѓаните „да ги заштитат гласачките кутии“.

Ердоган претходно вети дека „ќе излезе како победник“ во вториот круг. Турскиот лидер во изјава на Твитер рече дека, без разлика на резултатот, победник во првиот круг пред две недели е „турската демократија и турската нација“, а гласањето се одвивало во „празнична атмосфера што доликува на нашата демократија“.

„Турција покажа дека е една од земјите со најнапредна демократска култура во светот“, рече тој.

Ердоган рече и дека неговата партија ќе ја исполни својата одговорност кон Турција.

„Ќе излеземе како победници на изборите на 28 мај со зголемување на бројот на гласови што ги добивме на 14 мај и се надеваме дека ќе постигнеме историски успех“, додаде тој. Во првиот круг, одржан на 14 мај, излезноста на гласачите беше 87 отсто, а ниту еден кандидат не успеа да го достигне прагот од 50 отсто од гласовите.

Во првиот круг Ердоган доби 49,52 отсто од гласовите, а Киличдароглу 44,88 отсто.