ДВА БРАЧНИ ПАРА ГО КАМЕНУВАЛЕ МАКЕДОНСКИОТ КЛУБ: Мажите работат во комуналното, градоначалникот постави услов за да ги казни

Добивај вести на Viber

Македонскиот клуб во Благоевград го каменувале два брачни пара. Двајцата мажи кои полицијата ги приведе поради каменувањето на Македонскиот културен клуб „Никола Вапцаров“ викендов, се вработени во општинското комунално претпријатие „Озеленување“. 

Двете жени кои се уапсени за инцидентот заедно со нив се нивните сопруги, објави „24 Часа“. Приведените, кои се на возраст од околу 40 години и кои немаат претходно криминално досие, го признале делото. Градоначалникот на Благоевград Илко Стојанов вели дека санкционирање на извршителите на делото е во надлежност на Судот, а тој како работодавач може да преземе мерки кон двајцата вработени во комуналното претпријатие само во согласност со Кодексот за работни односи. Градоначалникот условува и бара реципроцитет. 

„Тоа значи дека ќе ги казнам оние кои се вработени во Општина Благоевград, со истата казна сo која што ќе бидат казнети цариниците, граничната полиција и другите функционери во Република Северна Македонија, што предизвика ментално и физичко насилство врз многу Бугари“, изјави Стојанов.

Инаку, градоначалникот и претходно го минимизираше демолирањето на клубот, велејќи дека тоа е една соба. Каменувањето се случи на 4 февруари, на денот кога се одбележува раѓањето на херојот Гоце Делчев. Бугарски државјани на граничниот премин Деве Баир направија инцидент, навредуваа полицајци, по што се приведени и добија забрана за влез во Македонија во наредните 3 години, а воедно треба да платат казна од 300 евра. 

фото МИА