ДОНАЛД ТУСК ДО СКОПЈЕ И ТИРАНА: Ве молам не се откажувајте

Добивај вести на Viber

Целосно ја разбирам вашата фрустрација, зашто вие го направивте вашиот дел, а ние не, им порача на Скопје и Тирана претседателот на Советот на ЕУ, Доналд Туск на денешната прес-конференција по завршувањето на Самитот.

Тој ги замоли двете земји да не се откажуваат. 

„ЕУ е комплексен политички субјект и навистина понекогаш ѝ треба предолго да одлучи, но апсолутно немам сомнеж дека еден ден ќе станете полноправни членки на ЕУ“, рече Туск.

Вели дека Македонија и Албанија не се криви и дека направиле сè што се барало од нив и дека Преспанскиот договор е извонредно достигнување, но, иако големо мнозинство од членките сакале, „неколку земји“ не биле подготвени да дадат датум за преговори.

„Лично мислам дека тоа е грешка“, рече Туск.

Во мај 2020 година, пред наредниот Самит на ЕУ во Загреб, европските челници ќе се навратат на ова прашање. 

Туск деновиве се обиде да го разубеди францускиот претседател, Емануел Макрон, но не успеа. Германската канцеларка, Ангела Меркел пак вели дека сметала дека е подобро да се третираат кандидатурите за членство на Северна Македонија и Албанија заедно, наместо да се дадат пристапни преговори само на Скопје.

Шефот на државата, Стево Пендаровски свика лидерска средба за в недела. 

Македонските власти претходно потенцираа дека земјата го смени името за да напредува во евоинтеграциите и дека тоа е голема жртва.