ДОЛАРОТ ПРОДОЛЖУВА ДА „ТОНЕ“ - трета недела по ред ја губи вреднсота, зголемувајќи го притисокот врз американската економија

Добивај вести на Viber

Доларот падна во однос на кошничката валути трета недела по ред, бидејќи американската валута и понатаму е под притисок од трговската војна меѓу САД и Кина.

Индексот на доларот, кој ја мери вредноста на американскиот долар во однос на шесте главни валути, падна за 0,6 отсто минатата недела на 99,23 поени, што е ново најниско ниво во последните три години. Еврото порасна за 0,3 отсто на 1,1390 долари. Американската валута ослабе и во однос на јапонската, за 0,9 отсто, па нејзината цена падна на 142,20 јени.

Доларот падна трета недела по ред како резултат на тековната трговска војна меѓу САД и Кина. Сепак, американскиот претседател Доналд Трамп минатата недела рече дека очекува трговски договор со Кина, но не даде детали.

Од друга страна, кинеското Министерство за надворешни работи објави дека Кина повеќе нема да обрнува внимание доколку САД продолжат да си играат со тарифите. Ова беше одговор на заканата на Вашингтон дека ќе ги зголеми реципрочните царини за увоз од Кина на вкупно 245 проценти за нејзините контрамерки.

И додека Вашингтон се фокусираше на тарифната војна, Кина воведе низа нетарифни рестриктивни мерки. Меѓу другото, во услужните индустрии како што се финансиите, консалтингот и туризмот, каде што САД со години имаат голем трговски суфицит со Кина, велат аналитичарите.

„САД и Кина се вклучени во невидена и скапа игра на кукавичлук, и се чини дека ниту една страна не сака да се повлече“, рече Тинг Лу, економист во Номура.

Покрај тоа, доларот е под притисок бидејќи се очекува слабеење на американската економија. Минатата недела, Џером Пауел, претседателот на американската централна банка, рече дека повисоките тарифи од очекуваните најверојатно ќе значат повисока инфлација и побавен економски раст.

Банката на федерални резерви, истакна Пауел, ќе чека повеќе економски податоци пред да преземе какви било мерки за каматните стапки.