До каде ќе и влезе Чифлиганец на „Комерцијална банка“?

Добивај вести на Viber

Ванчо Чифлиганец преку неговата градежна компанија „Адора“ и придружените друштва се издвои како најголем газда во „Комерцијална банка“. Си плати околу 10 милиони евра и ја качи пазарната цена на таа акција за 50 отсто, а значајно го зголеми и обртот на тргување

„Адора Инженеринг“, градежната компанија на Ванчо Чифлиганец продолжува да пенетрира во акционерската структура на една од двете најголеми деловни банки во земјава „Комерцијална банка“. Официјално е соопштено дека „Адора“ поседува 7,66 отсто од акциите во оваа банка, а заедно со своите придружени друштва вкупно контролира 8,08 отсто од сите акции со право на глас во банката. 

Од достапните официјални податоци на Централниот депозитар за хартии од вредност се гледа дека во период од само една седмица (од 25 јуни до 2 јули) „Адора“ го зголеми својот акционерски стек за 0,29 отсто односно за 6.609 акции. Од 22.003 истргувани акции на „Комерцијална банка“ повеќе од 6.600 ги купи „Адора“ тоа е вложување од половина милион евра за една седмица. Оваа компанија е убедливо најголемиот маркет-мејкер на пазарот со акцијата на „Комерцијална банка“. Прво затоа што купува најмногу акции, гледано поединечно, и второ затоа што мотивира многумина други помали инвеститори и трејдери да се качат на „трамвајот наречен желба за мрсна заработка на краток рок“. Само ови профитери на ултра кратки рокови мора да научат дека нивните мотиви не за купување не се исти со мотивите на Чифлиганец... И многу е веројатно дека мотивите на „Адора“ не се брза заработка со подигање на пазарната цена туку долгорочна контрола врз една од најголемите банки во земјава.

Како пенетрираше „Адора“ во „Комерцијална банка“

Првиот бран на купување акции се случи на 21 март годинава кога своите акции ги продаде шведскиот инвестициски фонд. Тогаш се истргуваа 298.003 акции односно 13 отсто од акциите на банката, а купувачи беа четири компании: „Адора“, „Гранит“, ИГМ Трејд и „Индустри Сервисис“. Единечната цена за акција беше 3.750 денари, а прометот беше 18,1 милиони евра. Не беше објавено која од компаниите колку акции купи, но веројатноста е голема дека „Адора“ купила над 70.000 акции. Претпоставениот, но непотврден влог во акции е 4,5 милиони евра. На 9 мај вториот бран – „Адора“ вложи 3,55 милиони евра во 52.189 акции во право на глас во „Комерцијална банка“. Цената за акција беше 4.200 денари. Тогаш „Адора“ стана најголем акционер во „Комерцијална банка“ со посед врз 7,19 отсто од акциите. По тоа Чифлиганец беше избран за член на Надзорниот одбор на банката. Во периодот од 9 мај до 2 јули „Адора“ уште околу 10.000 акции во банката и учеството се зголеми до 7,66 отсто од сите управувачки права.