Директор си поднесе оставка во ЕСМ по осум месеци

Добивај вести на Viber

По само осум месеци работа на новото директорско место, Државни електрани на Македонија остана без еден од седумте директори како членови на Управниот одбор. Формално е објавено дека Ѓорѓи Ѓорѓиевски повеќе не е директор за правни и општи работи во АД ЕСМ, а неговото име е избришано од одборот на раководители во најголемата енергетска компанија во земјата.

Станува збор за дипломиран правник кој претходно беше еден од најекспонираните советници во општина Битола и избирачки делегат на ВМРО-ДПМНЕ. Неофицијално, како што дознава „Фактор“, битолчанецот сам ја поднел оставката од лични причини.

Под надлежностите што ги имаше Ѓорѓиевски, освен правното застапување на друштвото пред судовите и другите државни органи, неговиот сектор вообичаено покрива следење и примена на законите, подзаконските акти и други прописи од областа на јавните набавки, користење на опремата и одржување на имотот, документираниот материјал и архивското работење.

Ѓорѓиевски беше назначен на оваа функција во август минатата година, заедно со Лaзо Узунчев како нов претседател на Управниот одбор и генерален директор на АД Електрани на Северна Македонија (ЕСМ).Членови на новиот Управен одбор на компанијата во државна сопственост истовремено станаа и Реџеп Асани како заменик-генерален директор, како и членовите Ѓорѓи Ѓорѓиевски - директор за правни и општи работи, Зоран Коњановски - директор на производство, Виктор Јовановски - директор за комерцијални работи, Иван Стојановски- директор за финансиски работи и Владимир Пејоски- директор на развој и инвестиции.

„Меѓу целите на новото раководство се оптимизација на трошоците, реализација на развојни проекти со цел АД ЕСМ да стане компетитивна компанија која ќе ги задоволи потребите од електрична енергија за крајните потрошувачи, притоа професионално прилагодувајќи се на условите на пазарот и строгите барања за чиста животна средина“, соопшти тогаш Владата за новиот состав на УО на АД ЕСМ.

Засега нема новоименувана замена за Ѓорѓиевски на директорската позиција за правни и општи работи во ЕСМ. Од минатата година новата власт ги промени и раководствата на подружниците на ЕСМ како што се РЕК Битола и РЕК Осломеј, но и на хидроцентралите и фирмите-ќерки.

А.К.