ДЕМОГРАФИЈАТА ИМ Е СЛАБА СТРАНА: Имаат скоро 160 села без ниту еден жител
Објавено во: Балкан 14 Април, 2017
Во соседна Бугарија постојат 157 места кои се водат како населени места, а во кои не е регистриран ниту еден жител.
Во 1.148 населени места живеат од 1 до 49 жители, велат податоците од бугарскиот Национален статистички институт.
Најмногу такви места има во областите Габрово, Големо Трново и Крџали. Во градовите во Бугарија живеат 5,2 милиони жители или 73,3% од вкупното население, а во селата 1,9 милиони жители, или 26,7% од вкупното население.
Во земјата на крајот од 2016 година се регистрирани 5.256 населени места – 257 градови и 4.999 села. Скоро половина од вкупната популација на Бугарија живее во југозападниот и југо-централниот регион, а најмалку на северозапад.
Бугарските медиуми деновиве пишуваа дека во земјата има се помалку венчавки и се повеќе разводи.Најдоцна во 2020 година Бугарите ќе паднат под 7 милиони, нешто што не се случило ни во годините по Втората светска војна.
Другиот демографски тренд е стареењето, така што речиси 21% од Бугарите се на возраст над 65 години и нивниот удел се зголемува секоја година. Дисбалансот во популацијата исто така е загрижувачки бидејќи од 2015 година Бугарија има само шест градови со над 100.000 жители.