Деловни банки ги спасуваат јавните претпријатија од пропаѓање

Добивај вести на Viber

Владата пред еден месец на седница ја разгледувала можноста јавното претпријатие „Национални шуми“ да се задолжи со кредит кај домашна деловна банка за да ја подобри ликвидноста во своето работење. Ова е запишано во записникот од седницата, но не се споменува за колкава сума на заем станува збор. За таа цел било решено да биде одобрена и државна гаранција.

Со тоа ова јавно претпријатие ќе го следи примерот на АД ЕСМ, кој кај четири домашни банки се задолжи со вкупно 80 милиони евра  Единствениот аргумент на Владата минатата година во октомври беше дека ЕСМ со добро менаџирање на подолг рок ќе застане на здрави нозе и дека ќе може да го отплаќа назад заемот.

„Владата ја разгледа Информацијата за издавање на државна гаранција на обврските на Јавно претпријатие за стопанисување со државните шуми Национални шуми П.О. - Скопје кои произлегуваат од Договорот за одобрување на долгорочен кредит од Комерцијална банка АД Скопје, со Предлог-одлука, ја усвои Информацијата и ја донесе Одлуката за издавање на државна гаранција на обврските на Јавното претпријатие за стопанисување со државните шуми „Национални шуми“ П.О. - Скопје кои произлегуваат од Договорот за одобрување на долгорочен кредит од Комерцијална банка АД Скопје, со заклучок текстот на истата редакциски да се усогласи со Секретаријатот за законодавство“, пишува во разгледувањето на една од точките.

Инаку на крај на август минатата година, Министерството за земјоделство, шумарство и водостопанство од државниот буџет во еден ден му префрли 250 милиони денари (околу 4 милиони евра) на „Национални шуми“ за да може да додели плати за вработените и да продолжи да работи. Тогаш министерството префрли и 100 милиони денари за АД Водостопанство, иако овие претпријатија треба да се самофинансираат.

Кај деловна банка задолжена беше и АД „Пошта“, но директорот Орхан Куртиши околу Нова година објави дека тој долг е предвреме вратен за да се намали трошокот за плаќање камати. Сепак, сега произлегува дека „Пошта“ нашла пари со тоа што со посредство на Владата добивала позајмици од други претпријатија. Ова е објавено од истата владина седница на 10 декември 2024. Се барале позајмици од 2,5 милиони евра.

„Владата по повод укажувањето на Александар Николоски, заменик на претседателот на Владата на Република Северна Македонија и министер за транспорт, а во врска со неповолната финансиска состојба во која се наоѓа Акционерското друштво за поштенски сообраќај „Пошта на Северна Македонија“ во државна сопственост – Скопје, заклучи Акционерското друштво за вршење на енергетска дејност пренос на природен гас НОМАГАС Скопје, во државна сопственост и Акционерското друштво за пренос на електрична енергија и управување со електроенергетскиот систем, во државна сопственост (МЕПСО), да изнајдат начин во рамки на своите можности заедно да обезбедат финансиски средства во вкупен износ од 150.000.000,00 денари, како позајмица за работење на Акционерското друштво за поштенски сообраќај „Пошта на Северна Македонија“ во државна сопственост – Скопје“, пишува во точката.

А.К.