Дали Општина Тетово има привилегии кај Владата и кај „Државни патишта“?
Објавено во: Економија 21 Јануари, 2020
„Видое Смилевски Бато“ во Тетово е првиот булевар реконструиран и рехабилитиран од ЈП Државни патишта и „Македонија пат“ со државни ресурси ставени на располагање. Ваква „привилегирана“ државна помош добива Општина Тетово, како една од најзадолжените локални самоуправи во Македонија.
Двете претпријатија, кои приоритетно се надлежнни за изградба и одржување на автопатите, регионалните и магистралните патишта, за прв пат работат на транзитен булевар во должина од 3790 метри, инаку во Тетово познат уште како „Индустриска“.
Претходно, единствено предизборно било одлучено вонредно од Владата во 2016 масовно да се рехабилитираат и
реконструираат општински улици во скопските периферни населби Сингелиќ, Инџиково, Булачани, Виниче, Страчинци, Црешево, Смилковци,Брњарци, Стајковци,Ченто, Волково, Радишани, Арачиново, како и улиците Љуботенска и Иво Лола Рибар кон Тетово.
Комплетната реконструкција и доизградба на булеварот Видое Смилевски – Бато се очекува да започне во месец март оваа година, со околу еден милион евра обезбедени од Светска Банка за Општина Тетово во форма на заем преку владиниот проект за подобрување на општински услуги. Со заемот од 60,6 милиони денари ќе се продолжи булеварот „Видое Смилевски Бато“, кој е главна комуникациска артерија за товарниот сообраќај кој од Скопје, Тетово и Гостивар се движи кон граничниот премин.
„Реализацијата на овој проект ќе започне напролет со оглед на тоа дека сите подготовки се веќе завршени и остануваат да се завршат работите на терен“, гласи во најавата од страна на општината.
Советот на општина Тетово на 16.05.2019 година, донесе одлука за спроведување на капиталнен проект за изградба на новиот дел од булеварот Видое Смилевски Бато со должина од 671 метри.
Александар Кузмановски