Црна Гора очекува помалку Украинци и Руси, но повеќе Македонци со минатогодишни цени

Добивај вести на Viber

Националната туристичката организација на Црна Гора очекува враќање на македонските туристи во уште поголем број, по две години пандемија, а за тоа уверуваат дека цените остануваат исти и покрај бранот поскапувања што го зафатија регионот.

“Туристите во регионов немаат навика за ран букинг, и по тој основ да добиваат поевтини аранжмани до 30 отсто. Во еден од најлуксузните хотели во Црна Гора “Сплендид” редовно доаѓаат македонски туристи, и тие се секогаш добродојдени за нас”, изјави вчера Весна Поповиќ од групацијата на хотели Монтенегро Старс која претстојува во Скопје.

Туристичкиот сојуз на Црна Гора го посети Скопје, каде претставници на Будва, Тиват, Улцињ, Бар, Подгорица, Цетиње ги споделија плановите за летото и ја поканија македонската јавност да ги помине летните месеци во некои од туристичките локалитети во Црна Гора. 

Лиљана Цукиќ, претставничката на НТО, вели дека Црна Гора ќе се потруди за престојната сезона да ги примами младите туристи од Македонија, додека истовремено има голем број на семејства од нашата земја кои традиционално летуваат таму. За бројки, вели дека е неблагодарно да се зборува, во период когасе уште владее пандемија.

- Има еден верен број на туристи кои секогаш се враќаат. Има една стабилна основа од 30-40 илјади, но ние сакаме таа бројка да се зголеми. Најважно за тоа е да го намалиме времето на патување. Патот преку Албанија се уште е најкраток, но се работи и на други делници, вели Цукиќ.

Цените на туристичките услуги се задржани на ланското ниво, и за приватно сместување се движат од 7 до 15 евра по човек, додека од 30-60 евра за апартмани. Црна Гора беше една од првите земји која уште во март ги укина Ковид сертификатите. Таа додава дека Црна Гора не ја прават само плажите, туку и еко-селата, спа-центрите, свежиот воздух и историските објекти.

- Силно ќе се трудиме да го надоместиме она што ќе го загубиме во смисла на бројот на туристи од Украина и најверојатно од Русија. Затоа воспоставуваме врски со Саудиска Арабија, Казахстан, Израел и Турција и отвораме авио линии со се поголем број градови низ Европа, додава Цукиќ.

Општина Будва најавува традиционално богата летна туристичка понуда со голем број настани, а градот има амбиција туристичката сезона да трае од март до ноември.

- Луѓето кои издаваат приватни сместувања и хотелиерите подготвија аранжмани за претстојната туристичка сезона, па така во будванските хотели со 3 ѕвезди може да се најде сместување почнувајќи од 30 евра со вклучен појадок, во хотелите со 4 ѕвезди почнувајќи од 40 евра, а во хотелите со 5 ѕвезди цените за сместување со вклучен појадок почнуваат од 97 евра по лице. Во зависност од категоријата на приватно сместување, цените за преноќување се движат од 10 евра па нагоре, најавува Тијана Котарац, општинскиот промотор на Будва.

Во Тиват велат имало сместување за 1.000 евра по ноќ, но има и за 10. Во Бар цените се од 7 до 30 евра по ноќевање. Цените традиционално се пристапни и за сечиј џеб во Улцињ. Од НТО велат дека коридорите се отворени и за Подгорица и Цетиње, каде што вреди да се посетат планинските центри.

А.К.