Ципрас со поддршка за Бутарис, а тој бара да се најдат виновниците за нападот
Објавено во: Балкан 25 Мај, 2018
Тоа што не те убива те прави посилен, му рече грчкиот премиер, Aлексис Ципрас на солунскиот градоначалник на почетокот на нивната средба во Солун, во врска со нападот врз Јанис Бутарис минатата сабота.
Тие по средбата, рекоа дека не станува збор за случаен, туку организиран инцидент, а грчкиот премиер го карактеризираше како „убиствен напад“.
„Градоначалникот на Солун немаше ништо од претходно со луѓето што го нападнаа. Не беше прв пат на манифестацијата во чест на пондијскиот хеленизам, секоја година присуствува“- вели Ципрас.
Тој ја изрази неговата поддршка за Бутарис за „убиствениот напад од организирани сили од радикалната десница“.
Бутарис му се заблагодари на грчкиот премиер за поддршката и кажа дека она што го помина минатиот викенд не беше случајно.
„Јасно е дека беше организирано, Не знам која им беше крајната цел. Но, она што знам е дека нема да оставиме да помине така. Трите „војничиња“ што беа казнети со затвор се само “играчки“. Она што е важно е да стигнеме до коренот, да видиме од каде почнува“- рече Бутарис.
Тој додаде дека Солун треба да стане пример за демократски град.
Солунскиот градоначалник во саботата за време на одбележувањето на годишнината од геноцидот на пондијските Грци најпрво вербално нарекувајќи го „предавник“, а потоа и физички со пластични шишиња беше нападнат од група граѓани во центарот на Солун.
По нападот медиумите пишуваа дека причина за нападот се и ставовите на Бутарис за Македонија.