Членот на Левица кој се расправаше со Заев на Могилата на непобедените е првостепено осуден

Добивај вести на Viber

Иван Јованоски од Левица e првостепено осуден за инцидентот со eкс премиерот Зоран Заев, соопштија од партијата. 

Тие велат дека нивниот член е осуден во монтиран случај по директива на Заев.  Од Левица додаваат дека на само еден ден пред Денот на народното востание на македонскиот народ, нивниот член прекршочно е осуден за настанот од минатогодишното одбележување на 11 октомври на Могилата на непобедените во Прилеп. 

„Јованоски тогаш му упати порака на Заев дека поради неговите предавнички политики и бришењето на антифашистичкото минато, тој нема никакво право да се појави и да оддаде чест пред жртвите на АСНОМ. Дека се работи за типична репресија на хибридниот режим, потврдува тоа што како подносител на Барањето за поведување прекршочна постапка не се јавува поранешниот премиер Заев – туку извесен полициски службеник Златко Николоски, кој не е оштетена странка во случајот. Ваквите тоталитарни методи на власта во пад потврдува дека Ковачески е доследен послушник на Заев, кој единствено владее преку партизираност на институциите, закани и прогон, а Македонија е целосно заробена држава од фамилијата Заеви. Континуираниот прогон со кој се соочуваат членовите на Левица од тоталитарниот режим на СДС и ДУИ само уште повеќе го мотивира нашиот борбен дух против оваа криминална банда на политиканти – а од позиција на власт и ослободени институции, Левица ќе иницира кривичен прогон против сите оние кои го силуваа правото и Уставот за време на Заевизмот“, велат од Левица. 

Партијата Левица најави дека ќе ги искористи сите инстанци за да ја обжали пресудата. 

На настанот лани, активисти на Левица порачаа на претставници на власта дека немаат право ни лице да бидат на Могилата, и рекоа дека треба да одат да си слават во Бугарија. Заев на ова им врати да одат на психијатар.