Почитувани министерки: Има и други добри и одговорни компании
Објавено во: Македонија 19 Март, 2020
Вицепремиерката Мила Царовска и се заблагодари на Комерцијална банка, јавно, затоа што предвреме ги платила аконтациите за данок на добивка за 2020 година. Тоа по неа, на фејсбук го стори и министерката за финансии Нина Ангеловска.
„Со ваква одлука Комерцијална банка АД Скопје придонесува за поголема ликвидност државата и нејзиниот буџет коишто се целосно ставени во функција на справување со коронавирусот и поддршка на приватниот сектор“, се вели во соопштението од кај вицепремиерката Царовска
А Ангеловска сподели аплаузи.
„Ова е солидарноста за која зборуваме. Ги повикувам сите кои се во можност да го следат овој светол пример. Сите кои имаат добивки, со авансното плаќање на даноците и помагаат на државата и на целото стопанство и граѓаните кои се соочуваат со проблеми, напиша Ангеловска.
Факт е дека потегот на Комерцијална банка авансно да уплати 120 милиони денари по основ на аконтативен данок на добивка е чекор за поздравување и треба да го следат сите компании кои имаат во изминатите години солидни приходи и значајни добивки.
Во таа група се секако банките кои во оваа криза можеби ќе бидат погодени, ама не колку секторот туризам и угостителство на пример. Меѓутоа во оваа фаза, пофалба заслужуваат и другите компании кои и покрај тоа што се соочуваат со намалена активност, со тотална непродуктивност и кои немаат ни денар приходи одлучиле да помогнат. Во таа група се и малите конфекции кои прават маски за беспари, но и поголемите фирми кои одлучија да донираат без да очекуваат нешто за возврат.
Повеќето банки се откажаа од надоместоците за он лајн банкарство за физички и правни лица, а компании со директни донации му помагаат на јавното здравство, како Макпетрол и Жито лукс денеска на пример ( имаше и други примери минатите денови).
Клиничката болница Аџибадем Систина ги стави на располагање сите респиратори, а и мобилните болници, плус дополнително и капацитети од хотели.
Затоа не е во ред да се потенцира само една компанија. Не е време за селективност и барем во оваа ситуација да не гледаме кои се поголеми и кои ни се блиски. Сите се за пофалба. Зошто некои имаат посебен третман? Дури вреден и за соопштенија.
А.Т.