Бомбите од Ел Чека и ги пратил и на Фетаи - обвинет за Диво насеље дал материјали за „Монструм“

Добивај вести на Viber

Во јуни оваа година, обвинетиот во случајот „Диво Насеље“ Шефчет Халачи, и испратил прислушувани материјали на обвинителката Фатиме Фетаи, поврзани со случајот „Монструм” за петкратното убиство кај Смилковско езеро. Кога Халачи и се јавил на Фетаи и кажал дека има 140 гига бајти прислушувани разговори, кои, како што рекол, му ги праќал и на Ел Чека. Обвинителката му кажала тие снимки да ги испрати и до поранешното Специјално јавно обвинителство.

Според Фетаи, меѓу снимките што и ги пратил Халачи, покрај за „Монструм”, има материјали и за други случаи што ги водеше поранешното СЈО, а сега ги води Обвинителството. Овие снимки јавноста веќе ги има слушнато и тоа се разговорите кои ги воделе бизнисменот Орце Камчев и новинарката Оливера Трајковска за овој случај.

Фетаи на денешното рочиште за „Монструм“ истакна дека сите материјали кои ги добиле во СЈО од Халачи, се предадени на Судот.

Судењето за „Монструм“ е во тек,  се чита документацијата што е изработена од извршениот увид. 

За петкратното убиство кај Смилковско езеро на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута. Врховниот суд во декември лани ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.