Азески: Фактор во медиумите, фактор во креирање на економски мислења и ставови - Разликата е во декадите, но моќта е идентична
Објавено во: Економија 27 Септември, 2022
Бранко Азески, претседател на Стопанската комора на Северна Македонија
Фактор во медиумите, фактор во известувањето, фактор во креирање на економски мислења и ставови. Едноставно името на медиумот апсолутно е синхронизирано со влијанието и моќта што ја има во креирање на јавното мислење, преку економскиот онлајн портал но и групата портали кои се дел од успешната ФАКТОР приказна. 10 години постоење во исклучително турбулентен период со кризи кои мутираат побрзо од вирусите, е само потврда за јакиот темел врз база на кој е изграден медиумот ФАКТОР. Со исклучително јасна визија и цел да биде влијателен во економскиот и бизнис свет, да делува во државата и да праќа јасни и конкретни сигнали што не чини, што треба да се смени, како тоа да се направи.
Секако Фактор, не би бил фактор во јавниот простор, ако не е воден од менаџмент каков што е тимот на медиумот на чело со Александар Манев. Успешен и докажан професионалец во светот на финансискиот бизнис (актуелен генерален директор на Кроациа осигурување АД – Друштво за неживотно осигурување Скопје), Алек Фактор, со изострен њух за бизнис, успеа да создаде успешна медиумска приказна со исклучително висока присутност кај читателската публика со уникатни вести, стории, анализи. И се разбира се` тоа не би имало смисол и успех, ако Алек не создал тим кој како и самиот портал е фактор во известувањето.
Како докажан медиумски професионалец и фактор на јавните простори, многу јасно, Манев е дел и од органите и телата на Стопанската комора (член на УО). Така и од другата страна е дел од иницијативите и ставовите на деловниот сектор и активностите кои се преземаат во насока на креирање соодветен деловен амбиент за бизнисот.
А каде сме денеска на економски план? Во центарот на најнеизвесната состојба со светската криза, чија форма и негативно влијание секој следен ден носи нови непознати и неможност за предвидливост. Скапата струја е главата причина за најавите од многу компании за намалување на обемот на производство, што претставува ризик и за намалување на бројот на вработени демне како црн облак. Во таа ситуација, Комората како консултант на бизнисот и Комора на иднината воспостави кризна состојба во своето работење и сите ресурси ги насочи кон остварување само на една цел – да им помогне на компаниите да ја надминат кризата, да се обезбеди енергија за да опстои стопанството, а и целата економија, бидејќи без економија нема држава. Ние преку бизнис делувањето тоа го правиме 100 години, Фактор преку медиумскиот простор 10 години. Разликата е во декадите, но моќта е идентична.