Анѓушев: Ако се одложи изградбата на гасоводот, ќе се сечат повеќе дрва за огрев

Добивај вести на Viber

Проектот е почнат и секоја промена ќе значи одложување на градбата на гасоводот и дополнително сечење на шума за греење на граѓаните, рече денеска вицепремиерот Кочо Анѓушев. Тој вели дека магистралниот гасовод низ Водно има регуларна градежна дозвола и за негова изградба државата веќе зела кредит и потпишала договори со изведувачи. 

Ако се одложи изградбата, вели тој, граѓаните ќе немаат алтернатива и понатаму да се греат на дрва или со други ресурси за огрев што се еколошки понеповолни и предизвикуваат поголемо нарушување на животната средина.

„Мислам дека треба да донесеме разумно решение. Апсолутно ги поддржуваме невладините организации кои се загрижени за Водно и сме на иста страна со нив. Сметам дека и тие ќе го препознаат овој момент за да се изнајде решение за ова прашање кое заслужува внимание, рече Анѓушев.

Вели дека веќе се ангажирал трасата да биде максимално променета во насока да се минимизира нарушувањето на животната средина на Водно. 

„Со таа акција за 50 од 60 проценти се намали сечењето на шумата на Водно. Ценам дека се направи максимален напор за да се намали било какво нарушување на животната средина, а при тоа Владата ќе земе обврска за секое исечено дрво да засади 10 и да ја анулира штетата на начин што ќе прогласи други заштитени подрачја во тој регион, потенцира Анѓушев.