Ангеловска- Бежоска: Монетарната политика останува релаксирана
Објавено во: Економија 04 Јануари, 2020
Високото ниво на девизните резерви со коишто располагаме, сѐ уште ни остава простор да делуваме како и изминатите неколку години и да водиме релаксирана монетарна политика којашто значи обезбедување доволна ликвидност во економијата и поволни услови за финансирање и на граѓаните и на корпоративниот сектор, изјави гувернерката на Народната банка, Анита Ангеловска-Бежоска, во интервјуто за Македонското радио.
Таа потсети дека надворешното окружување може да има влијание врз нашата економија преку повеќе канали како што се трговијата, условите на надворешно задолжување и странските директни инвестиции. „Но засега, според сите расположливи податоци, не постои потреба од затегање на монетарната политика.“ – порача Ангеловска-Бежоска.
Во интервјуто снимено на крајот на минатата година, гувернерката говореше и за остварувањата на економијата, за банкарскиот систем и за Програмата за работа на Народната банка за 2020 година.