(ГАЛЕРИЈА) Што заклучи Димитров по средбата со Коѕијас?

Добивај вести на Viber

Во Министерството за надворешни работи, се одржа средба помеѓу шефот на грчката дипломатија Никос Коѕијас и македонскиот министер за надворешни работи Никола Димитров, по што беше одржана прес-конференција.

Димитров изјави дека имале добри разговори во кои доминирало прашањето за разликите околу името и за градење на идните односи.

„Треба да најдеме решение кое нема да понижи никого и ќе ги отвори вратите на иднината“, изјави македонскиот министер за надворешни работи Никола Димитров 

Тој додаде дека ова е долгогодишен проблем, во кој заеднички интерес е да се најде решение. 

„Кога размислуваме за иднината тешко е да се најдат разлики, но за да се стигне до таму треба да ја надминеме актуелната разлика околу името. Задачата не е лесна, ова практично е втора вистинска средба на која разговараме за сите суштински елементи, Се работи за многу деликатен баланс. Половина ден размислувам што е важно за јавноста во Грција, а другата половина што е најважно за нас. Ако мало чекорче се направи во еден правец, целата равенка се поместува“,  рече Димитров.

Македонскиот министер додаде дека двете страни се обидуваат да изградат доверба, но посочи дека смета оти се уште има предрасуди.

„Мислам дека и од другата страна, се надевам Никос тоа ќе го потврди, има вистинска желба ова да се надмине, на начин што нема да понижи никого. Најважно е да не се допираат вакви прашања, но тоа не помага, затоа ќе продолжиме„   рече министерот Димитров

Тој најави дека следната недела  ќе има нова средба со Коѕијас во Виена на која ќе биде и медијаторот Метју Нимиц.

ФОТО: ФАКТОР