Премиерот бара поддршка од опозицијата за евроинтеграциите, тие го обвинија за партизација
Објавено во: Македонија 26 Јуни, 2017
Премиерот Зоран Заев по средбата со еврокомесарот Јоханес Хан на која се пренесоа детали за итните реформи преку новиот акциски план побара помош и од опозицијата кога се во прашање евроинтеграциите.
Премиерот рече дека ќе бидат фокусирани на реформите во правосудниот систем и ги повика опозицијата, невладиниот сектор и граѓанските активисти и експерти да се вклучат во овој, како што рече, инклузивен процес.
„Направивме краткорочен, среднорочен и долгорочен план со цел да ја отстраниме блокадата, а веќе следната година да почнеме преговори со ЕУ. Ние овој процес ќе го водиме инклузивно. Ја повикуваме опозицијата да се вклучи во реформскиот процес, да дејствуваме заеднички и да ја искористиме подрршката што ни ја дава ЕК“, рече Заев.
Засега од ВМРО-ДПМНЕ како најголема опозициска партија стигнаа само критики против Заев за најавите за промени во правосудството и државната администрација кои ги оценија како обид за воспоставување на партиска контрола.