Паркинг место, топ бизнис: ЈП „Градски паркинг“ го зема под свое и просторот во клинички центар

Добивај вести на Viber

Град Скопје донесе одлука со која ги дава на користење на ЈП Градски Паркинг двата големи паркинзи во кругот на кличничкиот центар „Мајка Тереза“ Едниот паркинг простор е со површина од 2731 м2, а вториот паркинг простор со површина од 1818 м2. ЈП Градски Паркинг има право да ги користи недвижните ствари од член 1 исклучиво со намена организирање на паркирање за потребите на Комплексот Клиники „Мајка Тереза“. ЈП Градски Паркинг од месечната добивка остварена од користење на паркингот во сооднос 2:1, два дела ќе задржи за сопствени потреби, а еден дел ќе му префрли на Министерството за здравство на РМ. Паркинзите му се даваат на користење на ЈП Градски Паркинг за период од 10 години. „Со оваа Одлука Градот Скопје на ЈП Градски паркинг – Скопје му ги дава на користење недвижните ствари кои се предмет на истата, со цел реорганизација на површините наменети за паркирање на возилата на вработениот персонал и посетителите на Комплексот Клиники „Мајка Тереза“ заради обезбедување на полесна пристапност до содржините на комплексот, поефикасно искористување на расположливиот простор за паркирање, подобрување на контролата на користење на паркинг-површините, како и редовно и квалитетно одржување на нивната хигиена. Согласно најавените планови за работа на ЈП Градски паркинг – Скопје посебни привилегии во делот на месечните претплати, како и можност за резервирани паркинг места, ќе бидат обезбедени за вработените во Комплексот, а за неговите посетители ЈП Градски паркинг – Скопје планира да утврди ниски и пристапни цени по час паркирање“ се вели во образложението на одлуката.