Oд кој српски политичар Борисов бара извинување?
Објавено во: Балкан 09 Јули, 2019
Бугарскиот премиер Бојко Борисов бара извинување од српски политичар.
„Сакам Ивица Дачиќ да ми се извини јавно, сега ќе разберат што е прифатливо, а што не е. Ивица Дачиќ мора да ми се извини. Што сум згрешил? И како е моето однесување неприфатливо? Вчера си дозволи да го повика нашиот амбасадор и да му каже дека моето однесување е неприфатливо. Дачиќ сега ќе види што е неприфатливо однесување. Тој сега ќе види … До вчера зборував со најдобри зборови, но откако си го дозволи тоа, се додека не ми се извини на мене, не ме интересира што ќе кажат ниту Александар Вучиќ ниту Ана Брнабиќ“, вели Борисов.
Тој откри дека Дачиќ се извинил вчера, но не јавно.
Агенцијата БГНЕС потсетува дека поранешниот портпарол на Слободан Милошевиќ и сегашниот министер за надворешни работи, Ивица Дачиќ, упати остри критики кон Бугарија по повод изјавата на бугарскиот премиер на самитот во Берлин на Западен Балкан во петокот, откако Борисов рече дека идниот лидер на европската дипломатија, Жозеп Борел, треба да ја изрази позицијата на целата Унија, а не на неговата родна Шпанија во врска со Косово.
Оваа позиција е категорична – признавање и почитување на суверенитетот на најмладата балканска држава.
фото БГНЕС