Нов пад на еврото

Добивај вести на Viber

Падна вредноста на еврото поради обновените стравувања за еврозоната кои ги засенија можните очекувања за решение на должничката криза на самитот на европските лидери во текот на оваа недела. Австралискиот и новозеландскиот долар исто така бележиат пад. „Податоците од Европа се слаби и ќе продолжат да влијаат врз еврото. Постојат надежи дека Шпанија ќе побара помош, но тоа допрва треба да биде утврдено", вели Марито Уеда, од „FX Prime Corp.“ Како што пренесува Блумберг, еврото падна во однос на повеќето основни валути или за 0.3% во однос на доларот, со што стигна до 1.291. Во однос на јенот пак исто така загуби 0.3% од вредноста и стигна до 101.25. Со доларот се тргува без голема разлика спрема јапонскиот јен или долар чини 78.43 јени. Понатамошно влијание врз еврото, најверојатно ќе имаат податоците за инвестициите во Германија на институтот ZEW. Во меѓувреме беа изнесени податоците за намалување на извозот на Кина во ЕУ за 10.7% во септември, што значи дека четврти месец по ред извозот бечежи пад. Европските лидери треба да се состанат во Брисел на 18-19 октомври, кога ќе се дискутира за понатамошните мерки за борба против кризата. Шпанскиот министер за финансии, за време на посетата на Токио, истакна дека неговата земја би можела да се финансира без меѓународната помош, барем до крајот на годината. Само последнава година еврото загуби 5.6% од вредноста.