На десет метри една маса со најмногу четворица: Се отвораат само локалите со надворешни тераси
Објавено во: Економија 13 Мај, 2020
Кафулињата и рестораните кои немаат тераса на отворено нема да можат да ги отворат локалите и покрај мерките за олабавување. Препораките од Комисијата за зарзани болести се на секои 10 квадратни метри да има по една маса, што во превод би значело дека ако терасата е на пример 20 квадрати, таму би се сместиле само две маси. На секоја маса не може да седат по повеќе од четворица. Ова е поради обврската да се одржува социјалната дистанца.
Ова го потврди и министерот за економија Крешник Бектеши, кој вчера за ТВ 21 изјави дека во Владата има некои несогласувања околу тоа кои угостителски објекти можат да работат, а кои не.
„Некои од членовите на Владата сметаат дека треба да им овозможиме отворање на локалите и на тие што имаат помали капацитети за тие што имаат тераси, но истовремено и на тие што функционираат само со затворени простории. Ова е единствената дилема во моментот“, вели Бектеши кој надополнува дека од Комисијата за заразни болести е препораката во 10 метри квадратни да има по една маса, и на неа да можат да седат не повеќе од четири лица.
Инаку министерот за здравство Венко Филипче изјави вчера дека од денеска се отвораат моловите, додека угостителските објекти ќе бидат отворени во наредните фази.