КАКВИ ЌЕ БИДАТ НОВИТЕ ЕКОНОМСКИ МЕРКИ - Ангеловска открива дел од нив
Објавено во: Економија 11 Мај, 2020
Периодот за опоравување на економијата доаѓа, а со него и потребата за нови мерки кои ќе бидат катализатор за побрзо враќање во нормала.
Ова на својот фејсбук профил го објави министерката за финансии Нина Ангеловска.
Таа најавува дека во Владата се размислува за нов сет на мерки, кои главно ќе бидат насочени да ја поттикнат приватната потрошувачка, со цел пред се да им се помогне на одредени сектори и индустрии.
„Се зборува за повеќе мерки, во главно насочени кон: поттикнување на приватната потрошувачка, со акцент на домашната понуда за поттикнување и помагање на одредени сектори и индустрии, како и поддршка на нови процеси и технологии за зголемување на конкурентноста на домашните компании“, напиша на фејсбук првата финансиерка.
Таа нагласува дека од особено значење за амортизирање на економскиот удар е и подобра реализација на капиталните инвестиции.
„Реализацијата на капитални расходи заклучно април е за 15 отсто повисока од лани, не сметајќи ја реализацијата на Јавното претпријатие за државни патишта, кое исто така има одлична реализација“, вели министерката Ангеловска.