ГИ ИЗГУБИЈА СЕМЕЈСТВАТА: Нема безбедно засолниште во Рафа за 600.000 деца
Објавено во: Свет 07 Мај, 2024
Над половина милион деца немаат безбедно засолниште во Рафа.
Во Рафа во моментов има 78.000 деца на возраст под две години и 175.000 деца на возраст од пет години, при што 8.000 деца до две години се соочуваат со акутна неухранетост и 65.000 деца со пречки во развојот.
Детскиот фонд на Обединетите нации (УНИЦЕФ) предупреди дека 600.000 деца во Рафа немаат каде да одат на безбедно во случај на израелски напад и принудно раселување во тој град на југот од блокираниот Појас Газа. Израелската армија издаде итна наредба за евакуација на Палестинците во источните квартови на Рафа и ги повика да се преселат во градот Ал-Маваси на југ.
„УНИЦЕФ повикува на заштита на цивилите и инфраструктурата што ги поддржува нивните основни потреби, како што се болниците и засолништата“, се наведува во соопштението на агенцијата на ОН.
Хуманитарната ситуација во Газа се влошува.
„Рафа сега е град каде што децата нема каде да одат на безбедно во Газа“, рече Кетрин Расел, извршна директорка на УНИЦЕФ.
Таа изјави дека некои од овие деца биле раселени повеќе пати и ги изгубиле своите домови и семејства. Премиерот Бенјамин Нетанјаху рече дека последниот предлог на Хамас за договор за прекин на огнот е дизајниран да го саботира влезот на израелската армија во Рафах.
Палестинската терористичка група Хамас на 7 октомври лани го нападна Израел. Потоа, Израел почна со операција во Газа за да ја уништи групата Хамас.