Двојно повеќе посети од Македонците во Грција
Објавено во: Македонија 07 Мај, 2024
Вкупно 1.128.000 туристички посети од Македонија лани се регистрирани во Грција, бројка што е нешто помалку од двојно поголема споредбено со 2022 година.
Податоците што ги објави дописникот на МИА се согласно податоците од Институтот на Асоцијацијата на грчки туристички бизниси (ИНСЕТЕ).
Минатата година за 46,5 отсто се зголемил бројот на посетители од Македонија споредбено со една година претходно, односно имало 1.128.000 посетители во 2023 година, наспроти 770.000 во 2022 година.
Во регионот во кој спаѓаат Солун и Халкидики, посетителите од Македонија се меѓу првите три земји.
Во истражувањето „Кој каде оди? Колку долго останува? Колку троши?“, ИНСЕТЕ ги анализира официјалните податоци на Банката на Грција за туризмот и туристите во земјата во 2023 година, а поконкретно се фокусира на секој од 13-те грчки региони.
Македонија и овој пат е меѓу првите 15 држави според бројот на туристи и останува без промени на 11-та позиција, иако драстично е зголемен бројот на посетители од нашата земја.
Првите 15 земји со најголем број посети и посетители на Грција се Германија, Велика Британија, Бугарија, Италија, Франција, САД, Романија, Холандија, Полска, Албанија, Северна Македонија, Турција, Австрија, Белгија и Србија.