Димитриеска-Кочоска: Четири од шесте најблиски соработници ја напуштија Ангеловска

Добивај вести на Viber

Техничкиот заменик-министер за финансии Гордана Димитриеска-Кочоска објавувајќи фотографија на својот профил на Фејсбук напиша дека Министерството за финансии во последните години го напуштиле голем број професионалци, меѓу кои и најблиските соработници на министерката Нина Ангеловска.

„Што се однесува до Министерството за финансии, имаме одлив на раководен кадар и квалитетни работници. Голем дел од кадрите кои ги донесе министерката или најблиските соработници, во предизборниот период ги напуштија своите функции. За само 6 месеци си отидоа два шефови на кабинет на министерството (Кристина Попова, Олимпија Христова Заевска). Си отидоа и најблиските советници на министерката, Ивана Станковиќ посебен советник за јавен долг и финансиски систем и Ања Марија Макеска, координатор на социјални медиуми и односи со јавност.

Впрочем ако појдеме од сликата во прилог од преставувањето на тимот на Нина Ангеловска, од 6 најблиски соработници дури 4 ја напуштија министерката“, напиша Димитриеска-Кочоска.

Соработничките на Ангеловска веќе претходно соопштија дека си заминуваат поради нови предизвици во кариерата. Кочоска-Димитриеска од јануари е дел од техничката влада за организирање на предстојните предвремени парламентарни избори на 12 април номинирана од опозициската ВМРО-ДПМНЕ.