Зошто „Гранит“ купи фирма што постои само пет месеци?

Добивај вести на Viber

Градежно-рударската експлоатација во Македонија продолжува со купување на сепарации за песок и чакал, како и на каменоломи. Интерес од големите градежни компании има и за помали асфалтни бази. 

Градежниот гигант АД Гранит, иако невообичаено за негови стандарди, од неодамна е нов сопственик на фирмата „Леп-Коп Инвест“ со променета адреса на булеварот Хасан Приштина кај скопско Визбегово. Оваа фирма е регистрирана само пред пет месеци со дејност вадење на чакал, песок, глина и каолин. Првичната адреса била во Карпош, а сопственичка извесната Биљана Милошевиќ - Поповска. Сега нов управител е Емил Јорданов, рударскиот инженер од АД Гранит.

Можно е ова преземање да оди во прилог на тоа што „Гранит“ во близина ја гради првата фаза од автопатот Скопје - Блаце, а исто така работи и на неколку урбани проекти во самиот главен град.

За очекување е ваквите преземања да продолжат со започнувањето на активната изградба на автопатите од страна на конзорциумот „Бехтел и Енка“ и подизведувачите на проектот Коридор 8 и Коридор 10Д. Според сознанијата на „Фактор“, градежната компанија „Жикол“ изминатиот период веќе има купено еден активен каменолом во регионот на Куманово.

Во меѓувреме, во повеќе региони во земјава имаше протести на локални жители поради црпењето на песокот од реките во близина на нивните села Иако изминатиот период имаше чести протести и блокади на локални жители од руралните средини, за очекување е да се засили динамиката на експлоатирање на градежни суровини од реките. Видливи се и поголемите ископи од рудниците, односно од каменоломите, во подножјата на планините, каде помасовно се експлоатираат минерални суровини.

Покрај „офанзивата“ со регионалните и магистралните патишта, се очекуваат и локални градежни проекти, особено со најавата на Владата дека 250 милиони евра ќе се распределат за општините. Во државниот буџет за 2024 има и околу 8 милиони евра за изградба на клучката на булеварот Хасан Приштина (Качанички пат) во Скопје, но тие пари ги бара и градоначалничката Данела Арсовска за бесплатен студентски превоз од ЈСП.

Од друга страна гласни се и екоактивистите кои аргументираат дека со ваквиот тренд да експлоатација се деградира животната средина и здравјето на луѓето.