Зошто ДУИ ги остави сами СДСМ во битката за поништување на лустрацијата
Објавено во: Македонија 15 Јануари, 2020
Политички маркетинг или издржано барање. Што сака да постигне владејачката ДУИ, со тоа што реши да не даде поддршка на предлог законот за поништување на лустрацијата во Собранието? Дотолку повеќе што овој предлог пристигна во законодавниот дом како владино решение, а во власта токму ДУИ е еден од партнерите, заедно со СДСМ.
Пратениците на ДУИ вчера во Собранието дадоа и образложение зошто засега не даваат поддршка за укинување на процесот на лустрација. Тие поставуваат услов прво да се реши статусот, односно да се рехабилитираат „политичките затвореници“, а за тоа претходно ќе биде потребна и поширока јавна расправа. Од ДУИ сметаат дека дури потоа треба да се зборува за потребата од евентуалното укинување на лустрацијата.
„ДУИ е за лустрација, бидејќи го гласавме тој закон, но сакаме за ова да има поширока дебата. Сакаме да се отвори и прашањето за поранешните политички затвореиници и паралелно да се реши прашањето за политичките затвореници од комунистичкиот систем“, рече Раџали Исмаили, пратеник од ДУИ. Завчера, пак, пратеници од оваа партија не присуствуваа на седницата на собраниската комисија за политички систем, на која требаше да се расправа за предлог законот.
На овој начин, ДУИ практично го оставија поголемиот брат во Владата, СДСМ, сам во битката за укинување на лустрацијата.
Претседателот на Комисијата, Александар Кирацовски, вели дека нема да ја закаже седницата, се додека не се постигне политички договор на повисоко партиско ниво за овој проблем.