ЖИВОТОТ СТАНУВА СЕ ПОСКАП - во јуни повисоки цени на овошјето и течните горива за домаќинствата

Добивај вести на Viber

Јуни бил поскап месец за живејачка во однос на претходниот месец, соопшти Државниот завод за статистика. 

Според податоците на Државниот завод за статистика, индексот на трошоците на животот и индексот на цените на мало во јуни 2020 година, во однос на претходниот месец изнесуваат 100,8.

Пораст на индексите на трошоците на животот во јуни 2020 година, во споредба со претходниот месец, е забележан кај свежото и разладеното овошје за 13,6 отсто, свежиот и разладениот зеленчук, освен компири и други коренести плодови за 6,2 отсто, сувото овошје и јаткастите производи за 3,5 проценти, пивото за 0,9 отсто, лебот и житата за 0,6 отсто, шеќерот, џемот, медот, чоколадата и кондиторските производи, прехранбените производи, неспоменати на друго место, виното за 0,3 проценти.

Во јуни 2020 година, исто така, пораст на индексите на трошоците на животот е забележан и кај течните горива за домаќинствата за 18,6 отсто, горивата и мазивата за сопствените превозни средства за 9,7 проценти, другите услуги за опрема за сопствен превоз за 1,9 отсто, велосипедите за 1,0 отсто, електричните апарати за лична хигиена за 0,8 отсто, услугите за одржување и поправки на живеалиштето, големите електрични апарати за домаќинствата, фармацевтските производи за 0,5 проценти..

Намалување на индексите на трошоците на животот во јуни 2020 година, во споредба со претходниот месец, е забележано кај жестоките пијалаци за 0,6 проценти, месото, јајцата за 0,5 отсто, сирењето и урдата, маслото и маснотиите, минералната вода, газираните пијалаци и соковите од овошје и зеленчук за 0,4 проценти, и полномасното млеко за 0,2 отсто.

Исто така, намалување на индексите на трошоците на животот е забележано и кај информатичката опрема за обработка на податоците за 5,7 отсто, гасот за домаќинствата за 4,2 проценти, моторните возила за 1,5 отсто, градините, растенијата и цвеќињата за 0,8 проценти... 

Индексот на трошоците на животот во јуни 2020 година, пак, во однос на јуни 2019 година, бележи зголемување од 1,7 отсто, а индексот на цените на мало бележи зголемување од 0,2 проценти.